عايز رأيكم في المقالة دي .. الإنترنت المفقود

عايز رأيكم في المقالة دي ... بعنوان :

الإنترنت المفقود :

http://www.20at.com/masr/t7kyk/12949-2009-08-16-13-23-08.html

رأيكم يهمني .. سواء هناك او هنا .. هيتشاف هيتشاف

حاجات في حياتي .... 1

فيه حاجات كتير في ذهني الأسير .. والحاير ما بين .. فساد الوزير وصبر الفقير
المهم يا عم الأمير
هندخل في الموضوع الخطير .. فيه حاجات جوايا كتير

أولها ... مريم .. الى انا خالها :

ماكنتش حاسس باي مسئولية تجاهها حتي قبل دقائق من رؤيتي لها .. ولكن تبدلت الأمور بمجرد النظر غلي وجهها .. روحت البيت لقيت ناس جيراننا قاعدين عند مريم الجميلة .. وانا بولع علشان اشوفها .. مهو انا كنت لسة ماشوفتهاش .. كنت حاسس أنى كرهت الناس جيراننا في اللحظة دي علشان كانوا سبب في منعي من الدخول و رؤيتها .
وبعد رؤيتها .. حسيت أني لازم اكون قدوة ليها يعني ما اعملش اى حاجة غلط .. زي مثلاً اني كنت بخرج البلكونة أشرب سيجارة ... فدلوقتي انا منعت نفسي أني أشرب سجاير في البلكونة لخوفى من ان الدخان يدخل عليها جوة في الأوضة .. أصل عندنا الوضة بتاعتى والغرفة الى فيها مريم بيطلعوا علي نفس البلكونة ... وحاجات زي كدة كتير .

مليكة :
بنت جميلة .. مشرقة.. وهي بنت زميلتنا في الشغل
وهي بتعني لي أكثر بكثير من مجرد بنت بلاعبها أو بتطمع في أملاكي من البسكويت وانا تعمدت في الفترة الأخيرة انى ما اجبش حاجة حلوة ألا علي فترات علشان مايبقاش كل علاقتى بيها مجرد بكو بسكوت .. عايز أعودها انها لما تحب حد تحبه لشخصه ... آه .. من دلوقتى
عارفين لما تشوفوا حد وبسبب رؤيته بتخدوا دفعة للأمام ... اهي مليكة دي نفس الحكاية معايا ... لو انا متنكد وزعلان وكل حاجة .. فلما بشوفها في لحظة واحدة بنسي كل حاجة ... علي الأقل لعدة دقائق بتقعدهم معايا قبل ما تنزل الحضانة ببقى نفسي تكون الدقائق دول يوم كامل
بس مامتها بقي ... هنقول ايه !!

نفسي :
بتجاهد .. بتحاول .. بتصارع علشان تكون أحسن .. ومش في كل الأوقات بتنجح
عمري ما حبيت أنى اخذل حد ولو علي حساب أى حاجة .. وبحاول ومش في كل الأوقات برده بنجح
بكره اللف و الدوران واعشق الصراحة حتي لو مؤلمة ... بس أوعاك تقولهالي في وقت شغل
انا من النوع الى مش بعرف أشتغل لو حالتي النفسية مش كويسة .. فماتحاولش تعكر نفسيتي
عندي تاخد أموالى وأملاكي و أسهم شركاتي وحسابات البنوك ... بس ماتعكرش حالتي النفسية !!!! :]


شغلى :
هو حياتي .. اول مرة احس في الشغل باحساس العيلة الواحدة
الى بكره يوم الأجازة علشان مش بشوفهم
الى بحب أختلافهم وأحتدادهم " إن وجد " ونقاشهم الى بيطلع في الآخر بحاجة


انا مش متعود اني أتكلم في حاجات في حياتي علي الملاْ كدة
بس ده لأني مش لاقى حد أكلمه ... وبكتب وأنا متطمن ... لأن مافيش حد من مديرينى بيجوا ناحية المدونة أساساً
بس الحمد لله .... طلعت الى في نفسي
وانت كمان روح دور لك على حد زي مليكة أو مريم تاخد منه الباور اليومي في الإمداد بالأمل و الأشراق و الأحساس بأهمية مقولة
شمس جديدة .. إذاً ... يوم جديد

وهما دول مجموعة بتكون شمسي الخاصة

معلش آسف أني بعرض حاجة زي دي .. ماتهمكمش في شىء .. لكنى عايز أفضفض .. وقد كانذ ساقع بالليمونذ

ياما في الميكروباصات حواديت

النهاردة يوم مش بطال بس اليومين الوحيدين الى بحس فيهم بالكسل و الملل الجمعة و السبت بما انهم أجازة ودي بتبقى فرصة أن الناس تشتغل بعض شاءت الظروف أني أركب العربية السوزوكي الصغيرة دي الى نازلة جديد وعاملة زي الميكروباص بس علي شكل علبة تونة ركبت جنب السواق علشان لو قعدت ورا يبقى كل شوية هنزل واطلع علشان الناس الى بتركب و الى بتنزل ومش كدة وبس .. شوفتوا افلام الكارتون لما بيروح طااااالع فوق خالص ويلزق في السقف وينزل تاني اهو كان ده الى بيحصل فى الناس الى قاعدين ورا قولت أفتح مع السواق ( شاب) حوار أو أى بتنجان يمكن يقول كلمة حلوة فقولت ادخل له من مدخله .. العربيات وقد كان وسألته علي سعر علبة التونة الى احنا راكبنها قولتله أصلي بفكر أشتري واحدة وأخلي اى حد يشتغل عليها قالي دى عامللها60 ألف جنيه .. بصيت له وقولتله نعــــم رد وقال ايوة بس هي ممكن تكون نزلت لـ40 ألف بس قولتله يا عم دى ملاكي أساساً مش أجرة وانت الى مشغلها ع الخط سكت وما اتكلمش وانا ما كملتش لأني ماكنش عندي أستعداد أن حد يشتغلني اليوم ده فقولت في دماغي ( أشتغلني يوم آخر ) علي رأي عمنا بوند

واحد تاني بقي في عربية ميني باااااظ شغالة علي احد الخطوط برده ركبت وقعدت وأترستقت وكله تمام .. و المعلم عمال بيشحن في العربية تقولش مثلاً أنها آخر مرة هيحمل زبائن في العمر المهم .. طلع ( طلعت روحه) وشغل الأم بي ثري الى موصله علي العربية والصوت كان عالي فعلاً .. وانا قاعد في المقصورة الى ورا و السماعات فوق ودني والناس وانا عمالين نادي على التباع و نقوله خليه يوطي التسجيل شوية يقولنا ده آآآآخر حاجة يا أبني يهديك يرضيك .. مافيش وقال ايه ... إلي مش عاجبه ينزل !!!!
أنسحبت من لساني في نفس ذات اللحظة قولتله لأ .. أنا مش عاجبني ومش هنزل بس بص .. أجرتك في أيدي أهي ومش هديلك أجرة غير لما البتاع يوطي مش عايز أجرة خليها عالي زي ما هو ... طبعاً هو افتكرني بتكلم كدة فى الهوا وخلاص وخلي الصوت عالي زي ما هو وانا بالفعل ماتدلوش أجرة وانا نازل قولتله بص أديك انت خليت التسجيل عالى وانا ما أديتكش أجرة بص وما أتكلمش

أما بقى المعلم رامي بوؤو ده سواق تويوتا بقى المرة دي أصلي بحب التنوع في الميكروباصات .. علشان الواحد ما يحرمش نفسه من حاجة المهم أنا راكب فى الكرسي الى جنبه واحنا ماشيين فشاف كام نفر كدة من القسم موقفين ميكروباص و بينزلوا الناس الى فيها علشان يركبوا هما ويلفوا بيه ( لدواعي إرساء الأمن فى المنطئة) راح قايل : ولاد الــ*** دول مش هيسيبونا نشوف أكل عيشنا بقى كل ساعة و التانية ياخدولهم عربية يلفوا بيها .. هما فقرا ما يجيبوا عربيات للقسم فأنا قولتله طب وانت بتعمل أيه لما بيجوا ياخدوك بالعربية علشان تلف معاهم قالي ولا حاجة ... بروح معاهم فأنا بصيت له عايز أقوله يعني انت عمال تتكلم وتشتم وبتروح معاهم برده بس هو عاجلني بسرعة وقال لي ضاحكاً مهو علشان كدة سمونى بوؤوو ... علشان زيي زي الشعب المصري كله بيتكلم كتير ومش بيعمل حتي القليل
ههههههههههههههههههههههههههههه

فضحكت وقولتله : طب وانت ليه ماتقولوش لأ .. دي عربية اكل عيش وانا مش هقدر أطلع معاكوا قالي : أصل الخط ده مش تبع السيرفيس يعني مش قانوني و العربية ذات نفسها مش قانونية لأنها رحلات مش أجرة وحتي لو أنا سليم و كل حاجة سليمة فدول أساساً بلطجية وممكن يلبسوني قضية ولا حاجة فأنا أروح معاهم ساعة ولا أتبهدل بالأسابيع في الأقسام وادفع غرامات أد كدة

!!!!!!!!!!!!!!!!!!!!!!!!!!

الخط الى مش قانوني الى الحاج بوؤوو بيتكلم عنه هو الخط الوحيد بمنطقة ذات كثافة سكانية عالية جداً ( عين شمس - دائري) فإزاى خط زي ده مش معمول له سيرفيس لحد دلوقتي .. بالرغم من .. أن الحكومة أكيد أكيد عارفة كويس أن فيه خط ميكروباصات الموت في الحتة دي وبالرغم من أنه بيعدي من أمام مبني حي المرج وبالرغم من أنه بيعدي علي مقر الحزب الوطني بالرغم من أنه بيعدي من أمام مركز الشباب إلا ان الظاهر هما شايفين أنه كدة أحسن ما يبقى قانوني لأسباب سرية تقتصر معرفتها علي الخبراء الى كلنا ثقة فيهم وفي إدارتهم للأزمات زي ما فيه فى نفس الشارع ماسورة مياه أنفجرت من كذا حتة .. محولة الطريق من عين شمس للدائري لبرك مياه منفصلة و المشكلة انها مية حلوة ولا الترعة الى بيقولوا انهم هيردموها ( بمنطقة عزبة النخل ) من عشر سنين ولسة لحد دلوقتي موجودة بل وأن المياه الى فيها ساعات بتطلع علي البيوت القريبة ...... من داخل علبة التونة مراسلكم في البحار / نضـــــال

لــمــا

هنغير طريقة تفكيرنا الأول
ومش لازم تكون سياسية بقدر ما هي تنموية و تربوية وأخلاقية و قيادية

يعني ....

لما العامل في المصنع يبقى عارف وحاسس ولامس أن الى هو بيعمله ده بيضيف لأقتصاد بلده ويحس بدوره القيادي فى العملية الأنتاجية دى ويتعامل علي أساسها أخلاقياً مع الناس ، بس برده لازم الناس تتعامل مع العامل ده على أنه رجل قيادي وله احترامه ومؤثر فى المجتمع .. لكن زي ما بنشوف العمال بيتعاملوا اوحش معاملة .

لما الى بينتج رغيف العيش ( الخباز) يبقى حاسس بمدي اهميته ومدي المسئولية الى بتقع عليه لو قصر في شغله او أنتخخخخ

لما الموظف يبقى عارف وواعي بماهيات دوره كموظف وانه موجود علشان يبقى تحت امر الى واقف قدامه على الشباك

لما المواطن يبقى عارف إن الظابط او اللواء ولا حتى اركان الحرب زيه زي اى موظف في الدولة موجود لخدمته ومايخافش منه

لما الصحفي يبقى فاهم وحاطط في دماغه انه صحفي يعني لازم يخدم الناس و المجتمع و يبرز الحقائق ومايمشيش عكس ما يمليه عليه ضميره علشان الفلوس الأكثر و المصالح الى من بره .

لما ميزانية الوزارات تتلغى منها حاجة أسمها إكراميات الصحفيين .. وهي بتبقى في الحقيقة رشوة للتغاضي عن شىء أو لنشر شىء او للحصول علي أوراق تدين شخص ما او جهة ما ، قام الصحفي بالحصول عليها بطريقة او بأخري

وياريت كل الى يتعامل مع طفل ما يتعاملش معاه على انه مش فاهم حاجة او ان أى تصرف سلبي قدامه مش هيأثر عليه في بعد .. فياريت واحنا بنتعامل مع طفل ولو لدقيقة يعرف أنه بيزرع فيه سمة او صفة من خلال تصرفاته .. فياريت كلنا نحاول نعمل ده .

لما المصريين يشيلوا من قاموسهم كلمة ( مافيش فايدة ) ويغيروا نظرة التشاؤوم الى بيبصوا بيها لكل حاجة

كون إيجابي ولو مرة ، أقرأ وثقف نفسك ، مش لازم تقرأ لماركس ومش عارف مين ومين ومين
بس أقرأ دستور بلدك علي الأقل وأعرف حقوقك وواجباتك .

لما أكبر هبقى أيه ؟؟؟

ع السريع :
______

أنا شايف أن الحكومة مش بتقدم التوعية الصح وان كانت بتعمل خطوات جادة تشكر عليها ولكن وجهة نظرى انهم لو قالوا للناس تروح تكشف عالطوول اول ما يجيلها برد حتى لو الناس عارفة انه برد عادى احسن من أى حاجة .. دى وجهة نظري .. وفى الأول والآخر ربنا مع الحكومة في مواجهة المرض ده وربنا يستر علينا . ______________________

لما أكبر هبقى أيه ؟؟؟
____

أشيب الشعر، منحنى الكتفين، لا يقوى علي تبديل رجله أثناء المشي و رفعها عن الأرض يقطع الشارع القصير في ساعة او أكثر ، وحيداً ،متوقف عن التفكير او ربما لم يعد هناك ما يفكر لأجله فالعمر قد ذهب هباءً ، او كمن أكتشف انه فى الحرب بعدما دخلت قلبه الرصاصة فالمظهر لم يعد يشغل باله كثيراً كما فى الماضي، فقد أصبح كالدمية البالية التي تنتظر لحظة أعدامها بألقائها بسلة القمامة وكذلك الطعام لم يعد أمراً ضرورياً، فلم تعد معدته تشكل فرقاً كبيراً بالنسبة له، سواء بفراغها أو بإمتلائها فهو لم يعد يكترث لما يبقيه حياً بكل الأحوال، ولم يعد يبذل مجهود ( من بتوع زمان ) كأيام شبابه العفية والقوية، فبات خاملاً غير قابل للتنشيط مرة أخري فقد وهـــــــن وفات العمـــــــــر عضلات وجهه أصابها الكسل، فأصبحت الكلمة بالميزان نفسه يحكى مشوار عمره لكل واحد علشان يستفيد من أخطائه لكن للأسف
.. فات الآوان
فى نهر الطريق وقف منتظراً يتسائل ..
من ذا الذي يعرض عليه المساعده دون أن يطلبها هو
ليأخذه إلي الجهة الأخري من الطريق
لا يعلم كم ستطول وقفته
يبكي من داخله دماً .. قلبه يفطر من حسرته
فها هو شبابه يمر امامه في ثوان
في لقطات سريعة لم تستطع شيخوخة عقله مجاراتها
لا تخلو من عتاب النفس علي لحظات الشباب التي لم يستغلها في مواضعها
وأحساسه بأقتراب الأجل او يحدث نفسه متمنياً له
ويحفزه علي الأقتراب
____
بكرة انا وانت وهى
هنكون قاعدين فى حتة متدارية عواجيز
.. مستنين
المساعدة من ده ودية
على العكاز متسندين..
متحسرين .. خايفين .. حاسين بخيبة قوية
ماتفوتش لحظة من شبابك
دى الشيخوخة قاعدة على بابك
مستنية ...

انا مش بكره حسنى مبارك

انا متغاظ أوى
ان فيه شوية متخلفين على الفيس بوك شمتانين شماتة فى الريس مبارك
من الآخر هما ناس كارهين نفسهم
وقال عاملين نفسهم من المعارضة
دول مرضي نفسيين وعندهم شعور عالى بالنقص
أيه ده بس ده يا ربى

أيه قلة الأدب دى
حتى فى الموت فيه قلة أدب وشماتة
وشوية ناس جايين مش عارف منين ومش متربين ومالهومش أهل من الاساس يربوهم
ومايعرفوش الأصول ولا عمرهم سمعوا عنها.

وانا بأكد على موقفى من سيادة الرئيس حسنى مبارك
انا مش بكرهه بشخصه .. ولكنى معارض نظامه ومعارض تقصيره فى متابعة أداء الحكومة
لكن فيه فرق كبير بين انى اكره حد وبين أنى اعارضه
انا مش بكره حسنى مبارك
..
انا لله وانا أليه راجعون
ربنا يلهم عائلة الطفل / محمد علاء مبارك الصبر و السلوان
ويسكنه فسيح جناته
ويغفر لأهله ما تقدم من ذنبهم وما تأخر
وللمسلمين أجمعين

بورررنو . بورنووو .. بورنوو

كلنا أكيد سمعنا قرار المحكمة بحجب المواقع الأباحية
بس انا بصراحة لا أؤيده مطلقاً ... لأنه غير فعال بالمرة بالنسبة لنسبة كبيرة من الشباب المتمرس في أستخدام الأنترنت

و الى ما كانش ليه أى علاقة بالتكنولوجيا ألا لأجل المواقع دى ولكن بعد ما اصبح محترفاً وليس هاوى .. اهتم اكثر غصب عنه مش برضاه بالتكنولوجيا .. على الأقل فى مجال المواقع الى بتقدم الأفلام البورنو دى بمعنى .. أنه من خلال تعامله مع الموقع .

ممكن يكون فى مرة جه يشغل فيديو ولقاه بيقوله انه محتاج لبرنامج الفلاش بلاير وتم التنصيب .. واشتغل وأديه بالطريقة دى اكتسب خبرة بطريقة غير مباشرة وهكذا تتوالى المشاكل فى التصفح .. ويتوالى أكتساب المهارات و الخبرات فأنا عن نفسي غير مؤيد للقرار بالحجب .. لأن الممنوع دايماً مرغوب لكن من وجهة نظرى .. الحل يكون فى توعية الشباب فى المدارس من سن مناسبة ( الأعدادية مثلاً ) و فى الجامعات بأضرار و مخاطر مشاهدة مثل تلك المواقع وما تسببه من ضرر نفسي .. فى المقام الأول

. هتقولولى ضرر نفسي عن طريق أيه !!
هنتكلم فى الحتة دى بصراحة شوية المنتجين و المخرجين الى بيعملوا الأفلام دى في أحيان كثيرة بيستخدموا الخدع فلما الشاب الصغنتوت لسة والى مش عارف ان دى خدعة يشوف الفيلم .. فده هيضعه فى مجال مقارنة الأعضاء ونفس المقارنة دى الى هتشعره بالعجز .. وانه لما يتجوز مش هيقدر يقوم بواجباته الزوجية ونفهمهم أن 99 % من الى بيحصل فى الأفلام دى .. منافى تماماً لتعليمات ديننا فى التعامل مع الزوجة أثناء النكاح

واحد تانى هيقول .. طب مهو لما الطالب يسمع الكلام ده .. هيبقى عنده حب أستطلاع أنه يشوف الفلام دى.

هقوله .. في حاجة اسمها ثقافة جنسية .. مش هجيب الولد وأفرجه على فيلم واقول أنا بثقفه جنسياً على طريقة التجربة الدنماركية ولو فيه رقابة فى البيت .. ولو الأب و الأم عندهم وعى تكنولوجى بحيث انهم يقدروا يتابعوا ابنهم او بنتهم على اجهزة الكمبيوتر .. يبقى مافيش حاجة من دى هتحصل وفى الأول و الاخر .. الموضوع كجذور .. يرجع الى نوعية التربية الى تلقاها الطفل وهو صغير يعنى مثلاً انا .. الحمد لله والديا ربونى أحسن تربية بس برغم ذلك عرفت اهرب من الرقابة إلي حد ما وأنحرفت كتير فى فترة الثانوية واخلاقى باااظت جداً فى الفترة دى لكن الجذور التربوية .. رجعتنى تانى لأصلى .. بمجرد انى بعدت عن أصدقاء السؤ

وعلشان ما أديش بقى الفرصة لواحد رخم انه يقولى انت عارف الأفلام و الخدع و الحاجات دى منين .. انت شكلك شوفتها قبل كدة ؟ هريحه وأرد عليه .. علشان دماغى بس أيوة .. انا شوفت الأفلام دى قبل كدة .. واينعم فى الأول كنت بستلطفها وبجد فيها ضالتى لكن بعد فيلم و التانى ... عرفت قد أيه هما ناس مقرفين .. ومالهمش دين واعتقد انه من المفيد انى شوفتها لأنى لو كنتش شوفتها هيبقى لحد دلوقتى عندى حب أستطلاع للحاجة دى وعايز اعرف هى أيه بالظبط وهشوفها هشوفها لكن دلوقتى .. انا شوفتها .. وعرفت طبيعتها .. وعرفت مدى القرف الى فيها وبعدت عنها من قبل ما اخلص الثانوية ... وشكراً نرجع لموضوعنا .. الحجب مالهوش لازمة بوجود ألآف البرامج المجانية الى بتخترق الحجب او حتى الحركة العبيطة بتاعت البروكسي واعتقد ان القرار ده لو اتنفذ هيدى فرصة للسوق السوداء .. أنها تعيد أمجادها من جديد وتبدأ موجة جديدة من أستغلال الشباب وأبو خمسة هيبقى بخمسين وياريتك تلاقيه .. ده ممكن يكون بالحجز زى مشروع الكباين كدة بفكر ابتدى فى المشروع ده من دلوقتى .. واهو يسند جمب الكباين حد جااااااااااى بورنو .. بورنو .. بورنوووو

ممكن تقروا بقى أراء متخصصين أجتماعين ومهندسين برمجييات فى الموضوع ده

NIDAAL

ده مش تهييس دى حقيقة

بعرف ألعب بنج بونج وبلياردو وكرة قدم وفولى بوول وأميركن فوتبول وبعرف أسوق عربيات بأحتراف بفضل الله ، وكمان بسوق موتوسيكلات وبيتش باجى .. وبعشق الصيد والتخييم وحياة البرارى الطبيعية .. .. تسلق الجبال هواية عمرى ما مارستها فعلياً .. لكن مارستها من خلال سور المدرسة العالي برغم أنه كان مليان فتحات ممكن أخرج منها وفى حاجات تانية كتير . يعنى بحب كل الرياضات الى فيها مغامرة وسرعة واهم حاجة كل مازادت نسبة الخطورة فى اللعبة أعشقها اكتر ونفسي نفسي .. أعمل قفزة "بنجى" عند سد كبير أوى كدة في المكسيك مش عارف اسمه ايه .
( انا مش مهيس أنا و الله بتكلم جد)
بس حاسس أني لسة أقدر اعمل حاجات كتير تانية

اهو انا كل الحاجات الى منعاها الحكومة بتاعتنا هنا انا بحبها .. فبالتالي لو الحكومة مش موفرة لى أماكن أمارس فيها رياضاتى وخاصة الخطيرة منها يبقى هضطر انى أمارسها فى الشارع .. وساعتها مش هتبقى خطرة عليا انا لوحدى لكن دى هتبقى خطرة على الناس الى فى الشارع كمان
..

بعد وقوع حادثة طريق المطار الشهيرة شددت الجهات المختصة ( المرور) الرقابة علي طريق المطار، بحيث تمنع التسابق الحر و الغير مقيد بقوانين.. إلي حد ما وفعلاً تم منعه جزئياً .. وبما أن الدم بيحن فقد تم القبض علي شابين
بشارع جامعة الدول العربية من فترة حاولا التسابق بطريقة غير رسمية وأعتقد اننا سوف نرى الكثير من تلك السباقات في الأيام القادمة ولن تكون غلطة الشباب بل هو خطأ الحكومة فبدلاً من أفتتاح العديد من مضمارات السباق و التى يتوافر بها شروط الأمان و ضمان خلوها من المدنين وبدلاً من تفعيل تلك الرياضة في مصر تكتفي ادارة المرور بالقبض علي الشباب ويظهر غيرهم ليلقى القبض عليهم أيضاً فما السبب وراء عدم أنشاء المضمارات للشباب لأمتصاص طاقتهم بدون إحداث أى أضرار بالغير وهناك من سيرى أن كلامى ليس ألا مجرد مزاح او كلام أندفاعى ولا يتمتع بالعقلانية فنحن في ظل ازمة مالية عالمية .. والكلام ده عايز ميزانية والعملية ... مش مجرد شوية اسفلت وأسياخ حديدية فانا هقوله لأ .. مهو فيه حاجات حالياً بيتصرف عليها ملايين واحنا مش محتاجنها أساساً انا لما بتكلم مش شرط يكون على العربيات بس او على أى رياضة تانية انا بس بقول أن الحكومة بتمسك فى الغصن مع أنها ممكن تحل المشكلة لكن ما فيش أسهل من انك تقبض على واحد وتدفعه غرامة وتحبسه ولما يخرج هيكمل نفس الرياضة ومش هيبطل وسوف تعاد الكرة

حكام مصر.. بالتواريخ

حكام مصر.. بالتواريخ!

محمد جمال الدين _ ولاد البلد _ عشرينات :

"محمد علي باشا" تعد سنوات حكمه أطول سنوات قضاها حاكم في العصر الحديث- 43 عاماً- بعد أن ناهز عمره 80 عاماً .. اليوم (4 مايو 2009) يتخطى الرئيس "حسني مبارك" أيضا عامه الـ 80 بعام، وبفترة حكم تأتي الثانية في الترتيب بعد محمد علي..
بين الاثنين حكام تولوا الحكم .. فهل تعرف كم ظلوا متعلقين بالحكم؟ وكيف تركوه؟ .. ذلك ما سنعرضه خلال السطور التالية..

1- محمد علي باشا (1805-1848)= 43 عاماً

يعتبر هو الحاكم الوحيد الذى اختاره الشعب بنفسه، دون تزكية أو ترشيح من جانبه لهذا المنصب.

تولى حكم مصر في 17 مايو 1805 نجح فى إدخال مصر عصر النهضة الحديثة، بطلب من رجال الأزهر والفكر في مصر، وشهد عهده استقراراً وتقدماً ونهضة في جميع النواحي الاجتماعية والتعليمية والصناعية والعسكرية، حتى أن أوروبا خافت من امتداد نفوذه إليها فقرروا التحالف ضده فيما عرف بمعاهدة 1840، بعدها تقدم به العمر، وبدأت تصيبه نوبات (خرف)، فتنحى عن الحكم عن عمر يناهز 79 عاماً.

2- إبراهيم باشا (يوليو - نوفمبر 1848)= 7 أشهر

بعد تنحي محمد علي باشا عن الحكم، تولى ابنه بالتبني إبراهيم باشا، الحكم، إلا أن فترة توليه للحكم لم تجتز 7 أشهر، ليتوفى عن عمر يناهز الستين عاماً، وذلك من يوليو حتى 10 نوفمبر 1848.

3- الخديوي عباس باشا الأول (1848-1854)= 6 سنوات

تولى عباس باشا الأول الحكم في عام 1848، إلى أن أغتيل في قصره عام 1854 عن عمر ناهز الأربعين عاماً، يوصم عهده بالرجعية، ففيه أصيبت حركة التقدم والنهضة التي ظهرت في عهد جده محمد علي باشا بالشلل، ثم تم اغتياله.

4- الخديوي سعيد باشا (1854-1963)= 9 سنوات

إثر اغتيال عباس باشا الأول تولى الخديوي محمد سعيد باشا الحكم ليلة 24 يوليو 1854، وقام بتأسيس البنك المصري بأموال أجنبية، ووافق على حفر قناة السويس، وقام بإغلاق المدارس العليا قائلاً جملته الشهيرة: "أمة جاهلة أسلس قيادة من أمة متعلمة"، توفى عن 41 عاماً.

5- الخديوي إسماعيل باشا (1963-1879)= 16 سنة

بدأت فترة حكم الخديوي إسماعيل في 18 يناير 1863 إلى أن خلعته إنجلترا عن العرش في 1879، وخلال فترة حكمه التي قاربت الـ 16 عاماً، أعطى مصر دفعة قوية للمعاصرة، إلا أنه أغرقها في الديون، وتوفي عن عمر 65 عاماً.

6- الخديوي توفيق باشا (1879-1892)= 13 سنة

تولى الحكم على إثر خلع إسماعيل من الحكم، هو الابن الأكبر للخديوي إسماعيل، وقام بإقصاء جميع رجال أبيه بعد جلوسه على العرش، وكان من المؤيدين للاحتلال البريطانى لمصر، وبعد قضائه 13 عاماً في حكم مصر، وافته المنية بحلوان وكان يبلغ آنذاك 40 عاماً.

7- الخديوي عباس حلمي الثاني (1892-1914)= 22 سنة

يعرف بوطنيته وسعيه للتخلص من الإنجليز، ومحاولته رفع شأن مصر اجتماعياً وثقافياً وفكرياً، وفي عهده شكلت أهم الجرائد والصحف، ونشر رجال الفكر مثل محمد عبده وجمال الدين الأفغاني وقاسم أمين أهم أفكارهم، للحرية التي أتاحها للمثقفين والأدباء، وفي عهده أنشئت جامعة القاهرة بأموال المتبرعين من العائلة المالكة إيماناً بأهمية العلم والتعليم، وبسبب وطنيته وحبه لمصر، عزل في 19 سبتمبر 1914. بقرار من قوات الاحتلال البريطاني، بعد أن لاحظ الإنجليز، ميوله نحو الأستقلال بالبلاد، وتقربه و شعبيته وسط المصريين، ثم توفى عند بلوغه الـ 70 عاماً.

8- السلطان حسين كامل (1914-1917)= 3 سنوات

قامت سلطات الاحتلال، بتنصيب حسين كامل، ابن الخديوى إسماعيل، سلطاناً علي مصر، حكم مصر لمدة 3 أعوام، شهد العالم خلالهم أول 3 أعوام من الحرب العالمية الثانية ومشاركة تركيا لقوات المحور ضد الحلفاء والإنجليز، ومحاولة استعانة الإنجليز بالجنود المصريين في الحرب، وتوفى عن عمر يقارب 64 عام.

9- الملك فؤاد الأول (1917-1936)= 19 سنة

عندما تولى فؤاد الأول العرش، قام بتغير اللقب وأصبح من سلطان إلى ملك، وفي عهده تغيرت ملامح مصر، وشهدت أيام من الديمقراطية وتبادل السلطة، بين حزب الوفد والأحزاب الأخرى، كما شهدت سنوات حكمه الأولى ثورة 1919 التي أعقبها حراك سياسي لم تشهد مصر له مثيل طوال تاريخها.

توفى الملك فؤاد في قصر القبة في 28 أبريل 1936، عن عمر 70 عاماً، ودفن في مسجد الرفاعي، وذلك بعد توليه مقاليد الأمور في مصر، لمدة 19 عام.

10- الملك فاروق (1936-1952)= 16 سنة

تولى العرش في السادسة عشر من عمره ، وظل على كرسي العرش، لمدة 16 عاماً، إلى أن أرغمته ثورة 23 يوليو 1952 على التنازل عن العرش لإبنه الطفل أحمد فؤاد والذي كان عمره حينها ستة أشهر والذي ما لبث أن خلع، وبعد تنازله عن العرش أقام فاروق في منفاه بروما، وذلك إلى أن توفي عن عمر 45 عاماً، وأوصى بدفنه في مصر.

كان سنوات حكم الملك فاروق مليئة بالأحداث السياسية الكبيرة، ففيها قامت دولة إسرائيل ونتيجة لذلك شنت مصر بمساندة عربية حرب 1948، بنوايا طيبة، ورغم نجاحها عسكرياً إلا أنها خسرت الحرب، وسيطر اليهود على فلسطين، كما شهدت أعوام عرشه الحرب العالمية الثانية، فساند فاروق ألمانيا بمعلومات استخباراتية نكاية في الإنجليز الذين لم يتعايشوا مع فاروق جيداً، وداخلياً عاشت مصر سنوات من تداول السلطة ونشر الثقافة والمعرفة.

11- محمد نجيب (1953-1954)= سنة

بتحويل مصر من ملكية إلى جمهورية، تولى محمد نجيب الحكم كأول رئيس لمصر، بعد قيام الثورة، ولم يستمر في الحكم إلا لمدة عام تقريباً حتى عزله مجلس قيادة الثورة ووضعه تحت الإقامة الجبرية بقصر الأميرة نعمة بضاحية المرج، وتوفى عن عمر يناهز 83 عاماً دون أن يجد من يحتفي به وبتاريخه، إذ كان صاحب شرارة إطلاق الثورة.

12- جمال عبد الناصر (1954-1970)= 16 سنة

يعتبر جمال عبد الناصر، واحداً من أكثر زعماء القرن العشرين إثارة للجدل، بين منحازين لإنجازاته، ومنددين بسياساته، فمن إيجابيات سنوات حكمه مساعدته كثير من دول العالم العربي ودول إفريقيا وآسيا وأمريكا اللاتينية على الاستقلال من الاستعمار، كما اعترف بحق الفقراء والفلاحين في ثراوات مصر الزراعية والصناعية وألغى الإقطاع ونشر التعليم المجاني.

لكن نفس هذه السياسات كان لها وجهها السلبي، فنشر التعليم المجاني أفرز خريجيين عديمي الخبرة، ورفع من شأن من ليس لهم وزن فكري أو ثقافي، كما جاءت سياسة التأميم بدون تخطيط إلى تعريض مصر إلى عدوان ثلاثي عام 1956، ثم جاءت عنترية ناصر لتعرض مصر من جديد لعدوان غاشم من إسرائيل 1967، في ظل أوضاع سياسية غير مستقرة، نكل فيها بمعارضيه وأودعهم السجون العسكرية القاسية، خاصة الإخوان والشيوعيين، وتوفى في 28 سبتمبر

13- محمد أنور السادات (1970-1981)= 11 سنة

يعرف ببطل الحرب والسلام، تولى في 15 أكتوبر 1970 الحكم وشن أكبر حرب على إسرائيل في 1973 وحقق فيها انتصارات عسكرية كبيرة، ثم قام عبر مفاوضات السلام باستعادة سيناء، فيما عرفت بمعاهدة كامب ديفيد التي يعزى إليها الآن خروج مصر من القضية الفلسطينية، واقتصار دورها على لعب دور الوسيط فقط، ونتيجة لهذه المعاهدة، قامت مجموعة إرهابية باغتياله في حادث المنصة الشهير، أثناء عرض عسكري في ذكري انتصارات أكتوبر، ليتوفاه الله عن عمر 61 عاماً .

14- محمد حسني مبارك (1981- )= 28 سنة (ولسه)

شغل صوفي حسن أبو طالب، منصب قائم بأعمال رئيس الجمهورية‏ لمدة ثمانية أيام عقب اغتيال السادات، حتى تسلم منه، محمد حسني سيد سيد إبراهيم مبارك والمعروف باسم حسني مبارك، رئاسة جمهورية مصر العربية منذ 14 أكتوبر 1981.

تقلّد الحكم في مصر وقيادة القوات المسلحة ورئاسة الحزب الوطني الديمقراطي، وفي عهده سجلت مصر تقدماً في عدد من المجالات، لكنها تراجعت على مستوى النمو الاقتصادي، وسجلت معدلات فقر وجهل ومرض لم تشهدها طوال أيام العصر الحديث.

نقلاً عن موقع عشرينات / صفحة ولاد البلد

الناس دى أصيلة .. ولازم أنكد عليهم بفيديو رخم شوية من الفيوم

للأسف ... الجميل

صدقتوا فى تعليقاتكم
وماعرفتش أبطل كتابة .. حتى في شغلى كنت هخليه شغل إداري بس لو ينفع ولو ما كانش هينفع كنت هسيبه خالص علشان أبعد عن الكتابة عامة ... لكن برده و الله ما أقدرتش أخرجها من بوووؤؤؤؤؤي
عموماً .. أنا هكتب وهفضل أكتب لغاية ما أموت إن شاء الله
وبعد كدة حتى لو قولت قولولى أنت كداب يااااض وبووؤ
..
أستاذي العظيم / عصفور المدينة
شكراً على كلام حضرتك إلي بجد خلانى فكرت فيه كتير
شكراً لحضرتك.
..
محمد حمدي
أدينى قابلتك أهو وقابلتك بفشل برده ... فشل فى فشلي فى الأمتناع

وأووووبااااا .... أوباا .. أوباا .. أوباا
أنا دلوقتى ماسك الشنطة وطالع على أوروبا
ههههههههههههههههههههه
..
أختى الصغيرة الى أكبر منى / آآآآبى كولومبوس
هقابلك فين وأنتى مخصمانى
بس أسمعى حتة الرااب دى

هفضل أكتب وأعيد وأزيد للأبد
هكتب وأقول كلام كبير علي أيدنا أتولد
كلام عظيم من شأنه يعيش للأبد
ومن غير ما أتعدي حدود الأدب
الكل يقدر يسمعه .. أب ، أم ، بنت كانت أو ولد
..
أختـــــــي الغالية / عـــاشـقـة الفـــــــردوس
بصراحة مش عارف أقولك أيه
بجد مش عارف
انتى بكلامك ده كنتى أحد العوامل الرئيسية إلي خلتنى
أخرج من المووود المقرف ده
والى مش عايز أرجعله تانى أبداً

أنتى وناس تانية كتير أصلاء .. ودايماً الأصل مش بيبان ألا في وقت الشدة
أنتى أصيلة يا عاشقة الفردوس
مهما كتبت .. والله مش هوفيكى ولا هوفى أى حد حق كلمة واحدة قالها .
جزاكي الله خيراً يا أختــــــــــــــــــــي الغالـيــــــة
..
بسمــة مسلم

كلمتك بتاعت مادام فيا نبض لازم أشتغل
ضافت لروحي المعنوية كتير
كتير أوي ... وشكراً على انى استهلكت جزء من وقتك فى كتابة الكومنت
ربنا يجزيكى خير إن شاء الله
..
جنــــــي
أنت تعرف أنى ماكنتش بفكر في أى حاجة
لا مهم ولا أهم ولا أى حاجة
أحساس وحيد مسيطر عليك .. الحزن والكآبة الى انا بكرهم أساساً
وعارف بسبب أيه
بسبب كلمة .. سطر بالظبط فيه كلمة هى الى وجعت اوى
وشكراً على دفعك لي ( كدة وقعتنى من على السلم) ههههههههههه
..
البنت الشرانـــية
يا بنتى حتى فى بوست الكآبة .. داخلة وش كدة عالطوول
خدينى على الهادى .. واحدة واحدة
هههههههههههههههه
وده طبعاً شرف ليا أن سيدتك بتنزلى وتركبى مواصلات مخصوص وتيجى تزورينى فى البلوج
ده حتى الحكاية دى أدتنى دفعة قوية
قوية جداً جداً
بس نحو التفكير الجدي في الأنتحار
ههههههههههههههههههههه
بس رجاء خاص يا شرانية انتى .. أوعي تدخلى تعلقى عند حد مكتئب تاني
بأمانة ... هينتحر
ههههههههههههههههههههههههههههههههه
شكراً يا بنت أنتى يا بنت
...
بشمهندسنا .. حبيبنا
مش حكاية البديل خالص
ببساطة لأنى فى عشرينات دلوقتى
ومن فترة كمان .. روحت قفلت البديل وطلعت على عشرينات
هههههههههههههههههههههههههههههه
اوعى تصدق انا ماشى من قبل الأزمة دى بفترة كبيرة
هشوفك النهاردة إن شاء الله
..
مايكل
يا ريسنا انت بتدقق في حاجات فاتت
يا أبنى خلى عندك أمل وتمسك حتى آخر خيط فى السجادة
وبلاش تكتئب .. علشان الأكتئاب هو الى بيؤدى إلي فشل حقيقي
ههههههههههههههههههههه
ده انا الى بنصحك . هاا
بس مسيره هييجى اليوم

بتوع الأنتر فيو أتصلوا بيك
:]
..
نونا
أكيد كل حاجة بتبقى سلاح ذو حدين
لو زادت عن حدها بتقلب بنتيجة عكسية وكذلك لو قلت عن حدها
كلامك جميل جداً بجد
ومفيد .. وهطبقه بالتأكيد فى الفترة الجاية من حياتي
شكراً جداً علي أهتمامك
..

انتوا بقى عارفين انتوا عاملين زي أيه
عاملين زى السيمفونية الموسيقية فى تعليقاتكم
لأنى لو أخدت من كل كومنت بتاع واحد فيكوا كلمة وحطتها على كلمة من كومنت تانى
هتطلع سيمفونية متكاملة وجميلة جداً
:D .... مشوا الوش ده أنه رافع الأبهام بتاعه .. كأنوا بيقول انتوا كدة ... مشوها كدة بقى

انتوا ناس جااااامدة من الآخر ... وشايفين البنت الشرانية دى بتعمل فيا أيه

شوفوا بقى أحداث جامعة الفيوم .. فيديو لضرب وسحل الطلاب المتظاهرين