أعدم الواد بتاع المونتاج يا ريس_ده خطاب للرئيس ولا حل كلمات متقاطعة_تحديث عااااجل مظاهرة نقابة المحامين

تحديث عاااجل:

مظاهرة شارك بها ما لايقل عن 9000 أمام كل من نقابة المحامين، الشهر العقارى، و نقابة الصحفيين للتنديد بالعدوان على غزة، و أعتقل الأمن ما لايقل عن 600 متظاهر، واعتدى على المتظاهرين بالهراوات، واعتدى على كثير من النساء بدنياً، وأنا كشاهد شوفت بعينى بنت مالهاش فى اى حاجة بس كانت ماسكة كاميرا ممسوكة ولا كأنهم ماسعين حرامية بينما صادر ظباط أمن المخروووبة ، الكثير من كاميرات وموبايلات صحفيين و مارة عاديون.

غير الوادالمونتيج ده يا ريس .. ده هيفضحنا أكتر ما احنا

الموت يعزف لغزة ... سكوت .. هنستمتع

عارف يا ريس أنا لو مكانك ... أعدم الى عمل مونتاج للخطاب اللى المفروض أنه مباشر
ايوة يا ريس الخطاب بتاع الصبح ده ... انت مدلع الناس الى عندك اوى
ده العيل الصغير بقى يقول أيه العبط ده ...أقلب أقلب يا نجم ده الفيديو متمنتج وعايزين يضحكوا علينا.. بس بصراحة كان بيصقف لك لما كنت بتهاجم أسرائيل
آه .. مهو مش متعود بقى أنه يسمع الحاجات دى .. مش متعود انه فيه حاكم عربى واحد ممكن يهاجم اسرائيل ...
مش عارف ليه ؟ .. بس انت عندك حق برده يا ريس
لما نحارب أسرائيل .. مين الى هيهربلنا المخدرات و الحشيش الى بتصبرنا على حكام بطرح
ولما نحاربها .. مين إلى هيستعمر طابا و يحولها لبيت دعااااارة كبير
وبصراحة احسن قرار و الناس مؤيداك فيه و الشباب خاصة .. أنك لا تحارب ولا تاخد أى رد فعل
آه .. مهو مش ناقصة يقوم الشاب فى دول الصبح ما يلقيش قرش الحشيش الى بيجيله هدية يومية من أسرائيل .
مهو انت اصلاً مش عارف يا ريس ... أسرائيل بتعملك اكبر خدمة فى حياتك .. تصدر المخدرات و تهربها علشان الشباب ما يحسش انه بيتسرق ولا انه فيه فساد .. وكمان يبقى فاقد الأحساس لما يتفرج على التلفزيون ويشوف ناس بتموت بالمئات .. مهو لو الشاب ده فايق .. أيه الى هيحصل
هيعمل أنقلاب عليك بمجرد انه يشوف بنى ادم واحد استشهد .. ولكن العدد قرب يحصل 400 شهيد و أكثر من 1750 مصاب .. وبرده ولا فى الدماغ ... و الأبتسامة المصرية المعروفة لم تختفى من على وجوههم .
فى الحالة دى بقى يا ريس مش المفروض نوجه شكر للقيادة العامة الاسرائيلية "وبلاش نقول صهيونية ليزعلوا"بالأصالة عن نفسى و بالنيابة عن كافة الشباب المغيبين .. الفاقدين لأحساس الادمية من كتر ما بتدوهم و اعوانكم من المخدرات ، وبتساعدكم الحكومة المصرية فى اشغالهم طول الوقت علشان ما يفكرووش فى مين الى بيموت ولا مين الى بيقوم ولا مين الى بيرتكب مجزرة ولا اى حاجة
وبهذه المناسبة العطرة تطمع رابطة الشباب الفرحانين على طووول، بزيادة الجرعات اليومية ،سواء من الشغل او المخدرات او اى عامل من شأنه التغييب ..يعنى انا فرحت اوى اوى
لما ناس أصحابى بيعزمونى على حفل الكريسماس ، لأنى حسيت فعلاً انه لازال هناك أمل فى ذلك الشعب الأبى الذى يأبى الكرامة و العزة .. ولا بديل له عن الهوان و الذلة

وبرده ياريس ... أعدم الى عمل مونتاج الفيديو بتاع خطاب الصبح
ده هيفضحنا كدة أكتر ما احنا مفضوحين الله يخرب بيته

أحنا يا ريس ندارى على بعضينا

لكن الناس الاغراب يشمتوا فينا

معايا يا نجم ولا انت لسة بتفكر أزاى تنقذ الفلسطينين .. ربنا يكون فى عونك يا سيادة الرئيس

لا تقلق .. نحن على الدرب معك .. بخطى ثابتة وقلوب مؤمنة .. إلى الهاوية نحن ذاهبون
............
وطبعاً الكلام ده مش على كل الشباب المصرى .. بس فيه فئة كبيرة مش حاسة بأى حاجة فى أى حاجة و الغريب انها فئة مش جاهلة و متعلمة ... ومش الى هيا هاااى كلاس اوى علشان ما تحسش بالى تحت " وده افتراضاً بأن الناس الهاى ما بيحسوش بالناس "اللو" بس فعلاً احنا عندنا نماذج كتير اوى أختارت انها تعمل فى صمت و تنتج و تجيب نتيجة .. ونماذج تانية اختارت انها تروح تتصورلها صورتين فى مظاهرة و بعد كدة تنسحب منها زى البوبى المربوط فى السلسلة
وصباح الفل يا ريس ... وزغرطى يا اللى انتى مفضوحة
لوووووووووووووووووووووووووووووووووووولى
العار لبسنا من ساسنا لراسنا
وكمان
لوووووووووووووووووووووووووووووووووووولى
وده الفيديو بتاعك المتمنتج يا ريس لاتكون ما شفتهوش ولا الواد المونتيج حب يداريه منك

أنا بهدى النفوس بس يا ريس ما تفتكرش كدةولا كدة .. لا تروح تموته حرااام تروح فيه .مش ده يا نجم الى يستاهل توسخ ايدك بدمه ... العميل.الخائن.الى عايز يفضحنا

أتعدم الحمد لله ... أهو انا كدة أستريحت عقبال الباقى يا ريسنا

NIDAAL

فيديو:خطاب السيد حسن نصر الله

تحديث :

أجهاض الأمن لمظاهرة اليوم بميدان التحرير .. والتى دعا لها قوى سياسية ووطنية متمثلة فى حزب العمل ،شباب 6 أبريل،لجنة فك الحصار عن غزة،وحركة كفاية

حيث قام الأمن بمنع الكثير من شباب 6 أبريل من الخروج من داخل محطات المترو،ولم ترد معلومات جديدة حتى الأن

وفيه حاجة هقولها فى السريع كدة عالطووول

ونتكلم بعدين فى االتفاصيل

لو كان الأخوان ما نزلوش الشارع كان اكرملهم واحسن لهم وعلى الاقل كانوا هيحافظوا على ما تبقى من تاريخ صنعه من قبلهم

فمن اول أنسحابهم من منتصف المظاهرة الأولى بنقابة الصحفيين ,وصولاً إلى أكتفائهم بالوقوف على السلالم،بالرغم من كثرتهم العددية الواضحة امس والتى تفوق فرق الأمن المركزى.

..........................

لينا قاعدة تانية

ودلوقتى مع شوية صور ... أحسن ما لفت نظرى و انا فى مظاهرة نقابة الأطباء أنضمام عدد من طلبة المدارس الأعدادية

ولم ينضموا عبثاً ،او لقوا مظاهرة ماشية مشيوا معاها ، ولكن من يراهم وهم يهتفون ،فأنهم يهتفون بحرقة تشعرك أن أهلهم من ضحايا العدوان الصهيونى "للكلاب" على قطاع غزة

مع الصور

عبد الرحمن فارس يحمل رمز المرحلة القادمة

"بالشوز يا بوبيهات"

حتى الأطفال شاركوا فى المظاهرات

جانب من مظاهرات القاهرة
باقى الصور على الكارت و الريدر مش راضى يقرا شكله باظ
فيديو :

جزء من خطاب السيد حسن نصر الله للعالم عامة و المصريون خاصة
أتحركوا .. اتحركوا ...أتحركوا


ملحوظة
مظاهرة غداً الثلاثاء بميدان التحرير ... ولكل الاراء احترامها و على راسى من فوق
بس فيه ناس مش هتعرف تروح تتبرع بالدم زى ما آآآبى قالت مثلاُ
و انا واحد منهم _فيه أشغال وفيه حاجات مانعة ناس كتير انها تعمل حاجة زى دى
يعنى مثلاً انا .. بغض النظر انى بروح أتضامن بحجة الشغل ... لو كنت فى شغل تانى غير الصحافة كنت هستأذن ساعتين و اروح اشارك و ارجع تانى
ولكل الاراء أحترامها
عارفين المشكلة فى أيه _ أننا كلنا متفقين على ضرورة الدعم ولكن بنختلف على اسلوب الدعم
وبس ... كل واحد يشتغل بالطريقة الى تريحه مادام مش هيأثر على شغل حد

تظاهر _ أتبرع بالدم _ أتبرع بفلوس
أعمل اى حاجة فى أى حتة

NIDAAL

نداء عاااااجل ... شاركونا وقولوا لا

أتفووووووووووووووووووووووووووو

هقولك أيه أكتر من أتفوووو عليك الف مرة .. طبعاً و احنا هنقدر نتكلم أزاى بعد ما شيخ الا زهر ربنا يحرقه فى نار جهنم راح لغاية اولمرت علشان يسلم عليه ,ويقولك هو الى جه وسلم عليا ,ياحبيبتى يا صغننة

أتفووووووووووووووو عليكم واحد واحد ... من أول مبارك لغاية أصغر متواطئ لا يستحق لقب عربى

بس ممكن ياخد لقب عربى مصهين

وعلى فكرة .... الفلسطينين بيشكروا جداً ماما سوزان على المساعدات الى دخلت و الى كان بقالها أسبوعين مركونة على المعبر مستنية الأذن الصهيونى

ولما دخلت دخلت قبل المجزرة بيوم علشان ما حدش يموت نفسه فى حاجة

اتفووووووووووووووووو على الهلال الاحمر كمان يلا

وأتفوووووووووووووووووو على كل خائن و عميل و بيستنى الاذن من كلاب صهاينة

كلالالالالالالالالالالالالالالالالالالالالالالالالالالالالاب
..........................

نداء عاجل لكل مصرى لسة فاكر انه مصرى

لكل واحد لسة الحكومة ما نستهوش أنه انسان

لكل واحد لسة بيؤمن بالاخوة العربية

أكثر من 250 شهيد فى يوم واحد لحد دلوقتى و 700 مصاب معظمهم فى حالة خطرة جداً

ولسة مش عارفين الوضع هيبقى ايه بس هو لا يبشر بالخير نهائياً ... تعالوا نطلع عن طوع الظالم الى حاكمنا ولو مرة واحدة

تعالوا قولوا كفااااية ظلم لحد كدة ..وكفاية قتل و كفاااية دمار

اليوم الساعة 12 ظهراً أمام مجلس الشعب مسيرة حاشدة دعا لها عدد من أعضاء مجلس الشعب

وجميع القوى السياسية و المراكز الحقوقية .

وفى حالة المنع هنتوجه الى نقابة الصحفيين و هنقف هناك وبعد كدة نشوف هنعمل ايه

بس المهم أنه النهاردة لازم نعمل حاجة كبيرة علشان الى كلمة مذبحة دى قليلة على وصف الجريمة البشعة

التى أرتكبت على يد يهود ..خنازير

وده فيديو صورته أمبارح لحرق العلم الإسرائيلى

متع عينك بحرق رمز الارهاب و الاستبداد .. وشاركنا النهاردة

و الى حارق قلبى أوى أن أمر الضرب طالع من القاهرة وليفنى "اللهى ما توعى تخطى خطوة كمان ولا تروح سليمة لبيتها يارب" تقولك أنا بلغت دول عربية و دول غربية وطبعاً معروف مين هى الدول العربية المقصودة " حكومة مصر " الله يخرب بيوتهم واحد واحد ويشوفوه فى عيالهم"... يعنى من الاخر ما حدش يلومنى على حاجة ... فكل واحد بقى يخلى باله

انا بلغت أحمد أنى هقتل صبحى فلما أقتله ما يجيش حد يعاقبنى .. اه ... أنا شغال على نور

وعل الاصل دور وخلى بالك من العلامة

NIDAAL

ياااااه..دى الدنيا دي..طبق سلطة كبيييير

"ياااااه..دى الدنيا دي..طبق سلطة كبيييير"

قال أيه : وأحنا عايشين جواه .. بذمتك مش مجنون

يكفى عند زيادة الضغط الجوى,أن يتطاير مسمار واحد,من أحد قوائم الطائرة أو الغواصة,ليتبعه قومه "المسامير",ليكون مصير الغواصة بمن فيها,في قاع المحيط ,ولا جدال على أن للقضاء قداسته,وعلى المحكوم عليه تنفيذ ما حكم به القاضي,ولذلك كان القضاء مستقلاً,ونزيهاً,وبعيداً عن أي شبهات,ولكن في مصر,وصلت درجة استقلالية القضاء إلى حد,أنه بات يصدر أحكاماً فقط ولا يتابع تنفيذها,وأن كان كما سيقول البعض أنه ليس بجهة تنفيذية,وهناك بعض من الصحفيين يتجنبون الكتابة عن القضاء و أحكامه,ولكني لا أجد نصاً واحداً بقانون تنظيم الصحافة ينص على ذلك,فيما عدا,عدم التعرض لقضية ما بطريقة تؤثر على سير المحاكمة العادلة,فنتابع جميعاًُ,محاكمة الحكومة لبعض الصحفيين الذين اخترقوا قرار حظر النشر في قضية مقتل سوزان تميم,و التهمة هي,عدم احترام حكم القاضي بوقف النشر,فتسارعت جميع الجهات لتطبيق القانون على هؤلاء الصحفيين في أسرع وقت ممكن,وكان واضحاً إصرار الحكومة على تنفيذ حكم المحكمة,بوقف النشر,وتشددت في التصريح بوجوب أحترام أحكام القضاء,اهو لحد هنا وكويس جداً أنه فيه جهة تنفيذية تتابع وتتأكد من التزام المحكوم عليه بالتنفيذ,ولكن الغريب بالفعل أنه وبالتزامن مع تلك القضية صدرت عدة أحكام ضد الحكومة,والتي تمثلت في حكم المحكمة بوقف تصدير الغاز إلي إسرائيل,لتقديم الادعاء ما يثبت أن الغاز يباع بأقل من نصف الثمن الدولي,في الوقت الذي لا يتوفر فيه الغاز الطبيعي المصري,للمصريين أنفسهم في الكثير من مناطق الجمهورية,بالإضافة إلى أن ما تبقى من المخزون قليل جداً,ولكن الحكومة تأبى تنفيذ الحكم,وقدمت طعون ضده,ولم يتوقف الضخ إلى إسرائيل حتى اللحظة,وأيضاً الحكم"الملزم"الصادر من محكمة القضاء الأدارى بمجلس الدولة,والذي نص على إلغاء قرار الحكومة بمنع الناشطون من إرسال قوافل إغاثية إلى غزة المحاصرة,فبعد الحكم ظن الناشطون أن هناك من يحترم القانون,وسوف يتم تنفيذ الحكم,فعقدوا العزم على الانطلاق من امام مبنى مجلس الدولة,كونه مصدر الحكم,ولكن وبطريقة " لو راجل وأبن راجل أعملها" قام الآف من أفراد الأمن بمحاصرة مجلس الدولة,ومنع أي من الناشطين الوصول أليه,وكأنهم يقولون "مش انتوا أخذتم حكم من مجلس الدولة,طب أحنا هنمنعكوا من قدامه"بإضافة إيماء"وش بيطلع لسانه",وضربت الحكومة للمرة الـ..."لما تتعب قولي",أحكام القضاء بعرض الحائط كما لو كنا في دولة بلا قانون

ولزيادة التأكيد,على إن حكومتنا "متينة",فلقد أصدرت محكمة القضاء الأدارى بالإسكندرية حكماً بعدم جواز ضم مدفن "أبو حصيرة",إلى الآثار اليهودية بمصر,وذلك كونه شخصاًُ مشكوك في انتسابه سواء للمسلمين أو لليهود,وبرغم ذلك,ظل المدفن"مسمار جحا",ضمن الآثار اليهودية إلى وقتنا هذا,ويقام المولد بانتظام كل عام,حيث تفتح المدينة أبوابها لليهود,وتغلقها على سكانها,يعنى لا منهم يبيعوا ويسترزقوا,ولا منهم بحريتهم على أرضهم,ولا يوجد أي وجه إفادة من ذلك المولد

"المزعوم".
عارفين الفيشار في الحلة بيبقي عامل أزاي وهو بيستوى,حركته عشوائية,لا ينظمها قانون,ويهدأ فقط,في حال انطفأت الشعلة من تحته,اهى الدنيا بقى هي الحلة ,واحنا الفيشار

....

سلى نفسك واتفرج على الفيديو ده

جاااااامد جداً .... وماتنساش تكمل الموضوع

ويمكنك أيضاً إضافة ما حدث في انتخابات 2005 لمجلس الشعب,عندما أدانت محكمة النقض سبعة من أعضاء مجلس الشعب,وبرغم ذلك ظلوا يمارسون أعمالهم,وعلق د.إبراهيم صالح نائب رئيس محكمة النقض,أن قرارات محكمة النقض ليست ملزمة لمجلس الشعب,بدعوى أن المجلس هو "سيد قراره",يبقى لازمتها إيه يا دكتور,مادامت ليست ملزمة,يبقى لازمة التحقيق و التدقيق و الوقت الضايع ايه؟ والأحكام "العقيمة" دى صدرت ليه.
هناك حقيقة واحدة الآن,أننا نعيش بداخل غابة,أسمها "الأرض",لا يوجد بها قانون يحمى المظلوم,القانون الوحيد هو السلطة,التي كثر إساءة استخدامها فأصبحت الغابة عبارة عن "طبق سلطة" في يد من بيده السلطة,ولو هناك من يعلو فوق القانون,يبقى نستبدل كلمة "قانون" بـ"سكسونيا على هواها",أو"بديعة بلطجة",أو أي اسم غير كلمة "قانون",أو"دستور",كي لا يفقد الجيل القادم معنى كلمة "قانون"وقدسيتها,ويحيا معتقداً أن القانون عبارة عن أقدام

"بديعة" ماشية على هواها جوة طبق السلطة.

محمد جمال الدين

NIDAAL

أهو.. بس

...

سيناريوهات قااااااتلة _مفبركة

عايزين سيناريو قااااااتل

خرجت علينا الصحف بنبأ القبض على مرتكب الجريمة البشعة, بمدينة الشيخ زايد,بداخل حى "الندى"
وكان الخبر بمثابة ضوء فى آخر الطريق,أو بمعنى أوضح,الصحف هى من جعلت ذلك الضوء فى آخر الطريق,فنجد جريدة الجمهورية قد خرجت علينا بقصة لكيفية إرتكاب الجريمة,تختلف تمام الإختلاف عن نظيرتها روز اليوسف,جاء فى الجمهورية بالصفحة الأولى أن الصبى المتهم يبلغ من العمر "19 عاماً",بينما و الظاهر أن المتهم قد تقدم عاماً عندما دخل بصفحة الحوادث,أما وصف كيفية إرتكاب الجريمة,فكتبت أن الجانى "الى عمره بيزيد بين الصفحة وأختها"كان ينوى سرقة فيلا مجاورة,ولكنه إكتشف أن جميع أبوابها من الحديد,فأتجه الى فيلا"نادين"_على حد وصف الجريدة_وفى فقرة أخرى,يلتقى المحرر وأسرة الجانى,فتنكر الأسرة مغادرة أبنها للمنزل ليلة إرتكاب الجريمة .
ولكن الظاهر أن جريدة روز اليوسف,كانت تملك سيناريو أكثر دراماتيكية,فكتبت,أن الجانى ظل يراقب الفيلا لفترة طويلة,وعند لقاء المحرر والأسرة,قالت أسرة الجانى,أن أبنهم عاد الى المنزل فى الساعة السابعة صباحاً,ولم تبد عليه أي علامات غريبة.
وفى نفس الوقت,تشهد الصحف بأن "العتلة",هى عامل رئيسى فى كشف الجانى,هل نتذكر اين كانت تلك "العتلة",ومن الذى قام بتسليمها للنيابة لتحريزها بعد أهمال فريق العمل المتواجد لرفع البصمات ولتحريز أى شىء من شأنه الإفادة فى الكشف عن الجريمة,ظلت تلك العتلة حتى اليوم التالى بمكانها,إلى أن سلمها والد "نادين" بعدما أكتشف عدم تحريزها,وذلك ما أفاد به والدها بأحد البرامج التلفزيونية

المشكلة دلوقتى ان الجريدتين ..بتوع الحكومة

وكل واحدة بتقول حاجة غير التانية

يبقى مين الصادق .. الأخت ولا أختها ولا أبوهم

......

وده فيديو قصير جداً للى ما راحش ولا شافش تمركز الامن الرهيب امام مجلس الدولة يوم أنطلاق القافلة لغزة

و الى واقفين على السلالم دول مش متضامنين ..دول عبارة عن فرق كاراتيه

و انتوا شايفين المنظر ..أهو.... وده عبارة بالظبط كدة عن 8/1 حجم القوات الامنية الى كانت هناك الى كانت العربيات بس بتاع 18 عربية امنمركزى متراصة على جانبى الطريق

شوفووووووووووووووووووا

NIDAAL

هجوم بأوامر عليـــــا ...

هجوم بأوامر عليا.. ثمن إتقان المهنة

عندما قال محمود سعد,أثناء تقديمه لحلقة من حلقات برنامج البيت بيتك,أتابع الإعلام أحياناً,فى رد مستهجن يحمل علامات الإستفهام على سؤال المتحدث الرسمى لوزارة الخارجية المصرية حسام زكى,حينما سأله الأول عن سبب عزوف حجاج قطاع غزة عن الخروج برغم الإدعاءات بفتح المعبر,والغريب أن السيد متحدث وزارة الخارجية يستند فى مصادره على ما تكتبه الصحف ووسائل الإعلام,ويتخذها كمصدر معلوماتى من المفترض أن يكون هو نفسه مصدرها,عندها يمكننا إستنتاج أن الإعلام فى مصر أصبح فى مصادره أقوى من وزارة الخارجية المصرية.

وعندما يفشل وزير الإستثمار فى شرح فكرة مشاركة المواطن للحكومة فى أدارة الأصول العامة للدولة"صكوك الملكية",بصورة واضحة يمكن للمواطن البسيط ,الى مالوش فى السياسة ولا حتى بيصوت فى الأنتخابات ومايعرفش يعنى أيه خصخصة,تمكنه من إستيعاب الأمور بشكل واضح,ليعرف ما له وما عليه,والى يزيد البلة طين,أن سيادته لا يعلم كم تبلغ قيمة الصك الواحد,وهو الراعى الأول للمشروع,مع الأخذ بالحسبان أن المشروع سوف يناقش بمجلس الشعب خلال الفترة القادمة للتصديق عليه أو "رفضه",بعد دراسة أستمرت لمدة ثلاث سنوات,وسيادته بيقول"لسة ماحدش يعرف",يبقى أكيد أنا وانت الى عارفين وبنعتم .

وعندما يحول دكتور بجامعة القاهرة,كلية علوم,الى التحقيق بسبب عدم حضوره للمراقبة فى لجان الإمتحانات,وفى الوقت ذاته,هو هو نفس الدكتور,مشرف على رأس قائمة من كبار العلماء,بوكالة ناسا الإمريكية,يستعدون لإطلاق مسبار فضائى لإستكشاف المزيد من جوانب الفضاء الواسع,وعدم إخذ الجهات المصرية ذلك المنصب الهام جداً بالنسبة لكل مصرى,فى الحسبان ومراعاة ظروف أشرافه فى أكبر وكالة فضاء عالمية,ذلك الدكتور بمنصبه,يمثل مصدر للفخر والأعتزاز,بعدما لم يجد المصرى شيئاً ليفتخر به,لكنه فى نفس الوقت مازال بأمكانه الأفتخار بمن أشعل النيران بمبنى مجلس الشورى,والمسرح القومى,بالأضافة الى محكمة جنوب القاهرة,وهو المتهم الأول والأخير للأبد,الماس الكهربائى,الذى طاف على أكثر من مكان بالجمهورية,والظاهر أن شكله كدة بيحب الأوراق والملفات الهامة والمصيرية,فأصبح "ماس"تحت الطلب.

ولم نشهد يوماً فى أى دولة بالعالم,أستمرار وزير فى مباشرة أعماله,بعد وقوع العديد من الحوادث ,التى يسأل عنها,كخطف الأجانب ولن أقول تعذيب وتهديد المصريون,لأنه وببساطة المصرى مالوش دية,لاهنا ولا فى السعودية,والدنيا تقعد وتقوم لو فيها أجانب,لكن لو مصرى هتفضل زى ماهي,وتستحضرنى مفارقة غريبة لا أستطيع تجاهلها,وهى إقالة وزير الخارجية الفنلندى "أيلكا كانيرفا",فى وقت سابق,بسبب إرساله لرسائل قصيرة,الى تليفونات بعض السيدات بغرض معاكستهن ,ربما كمصريون نرى أن السبب تافه للغاية لا يستحق أن يقال من منصبه بسبب تصرف مماثل,وذلك لأننا قد تواءمنا والتهديدات,مع الحياه الغير آدمية فى نفق مظلم واحد ,واصبحت جرائم التعذيب والخطف والإعتقال والقهر والظلم والقمع,شئ عادى جداً,باتت غير مؤثرة ولا تصاحبها نغمة قاسية على طبول الأذان الصاغية.

والأكثر غرابة هجوم جريدة "روز اليوسف",على "محمود سعد" بعدما حاول معرفة المصادر التى يعتمد عليها متحدث وزارة الخارجية,فى تلقى المعلومات,الموثوقة والمؤكدة,وقيامه بواجبه كأعلامى محترم يحترم أصول وقواعد مهنته فى تحرى الحقيقة,مما يوضح مدى الحالة الرثة التى وصلت اليها الصحف الحكومية,فى الهجوم بدون أى تفكير,وذلك لأنه .. هجوم بأوامر عليا .

NIDAAL