إسراء و السايبرجى

التكنولوجيا وجدت لتخدم البشرية وتجعل حياتهم اكثر سلاسة وسرعة وأنجاز ولتخلق أجيال قادرة على التطور و التعايش مع متطلبات عصرهم
أما التكنولوبيا فهى أختراع وجد خصيصاً لتدمير المجتمع و المساعدة على أنهيار الثقافات

فبينما فشلت أمريكا و اليابان و حتى الصين ( الى مش سايبانا فى حالنا ) فى اختراعه .. كانت العقول المصرية الشابة تحاول وتعمل وتجتهد وتعمل فى صمت وراء أبواب المعامل المغلقة، لأخراجه إلي النور وتقديمه إلي العالم .

وفى السنوات الأخيرة أنتشر ذلك الأختراع بصورة رهيبة فى الأوساط العربية عامة و المصرية على وجه الخصوص من باب التعاون المشترك و الحس العربى القومى وايضاً للحفاظ على الهوية العربية ضمن قوائم أكثر 10 أختراعات أثرت فى تاريخ البشرية .

ولنتعرف على ذلك الأختراع وتأثيره على مستخدميه كان لنا الحوار التالى الذى نقلته المجسات السرية من على احد الشاتات بين شاب فى الـ 24 تقريباً و فتاة كل ما علمناه عنها انها تدعى أسراء ولا تتوافر معلومات حول ما أن كان الأسم صينى أم تقفيل فنلندي مستعمل .

السايبرجى : أنتى تعرفى انى كنت بموت علشانك
انا بقالى تلات أيام ما نمتش

أسراء : ..............

السايبرجى : علشان حسيت أنى جرحتك فى آخر مرة اتكلمنا فيها، بس أنتى برده نرفزتينى يا أسراء

أسراء : ................

السايبرجى : علشان أحنا بنحب بعض من 6 شهور وماشوفتكيش لسة ولا شوفتينى، و قولتيلى انك مش هتعرفى تزوغى من البيت حتى فى العيد .

أسراء : .................

السايبرجى : يا سلام، مش بتعرفى تنزلى الشارع كمان، انتى بس أدينى العنوان و انا آجى اخطفك.

أسراء : ................

السايبرجى : وتتشردي فى الشارع ليه بقى إن شاء الله، هى سوسن الى هتخطفك، ده هى شقة اوضتين وصالة حلوة كدة ، ولا اقولك تلات أوض وصالة ومطبخ و حمام و هتقعدى معززة مكرمة ، أنتى معايا أنا يا عمري، هو أنا قولتلك قبل كدة أنى بعشقك، مش هنتجوز و نخلف بقى ولا ايه .

أسراء : .................

السايبرجى : باللاسلكى، لأ يا حبيبتى، مش هنخلف باللاسلكلى، بس أنتى تقوليلى تعالى خدنى بس ومالكيش دعوة بحاجة، وإن كان على أهلك سيبك منهم .

أسراء : ................

السايبرجى : انا بموت بجد، مش قادر أستنى أكتر من كدة، طب أنتى ساكنة فين و انا اجيلك، اشوفك بس وانتى نازلة من البيت رايحة اى حتة .

أسراء : ..................
السايبرجى : المنصورة !!! ، اجيلك برده مسافة السكة واكون عندك _________ يا كابتن ، انا بكلم واحدة وعايزها تفتح الكاميرا بس هى ما بتعرفش

الكابتن ( انا ) : ما بتعرفش ، ياراجل، هو فيه حد ما بيعرفش دلوقتى

السايبرجى : آه و الله هى الى بتقول، ممكن بس تقولى أقولها تفتحها أزاى علشان مايبقاش ليها حجة

أنا : طب يا عم ، قول لها توصل الكاميرا فى اليو أس بى بتاع الجهاز، وتيجى على أيقونة الكاميرا الى فى الشات وتدوس عليا و .......... ، عيش يا ريس .

السايبرجى : شكراً يا كابتن، يا لهوووووي ، ده انتى حلوة قوى يا أسراء يا عمرى يا حبيبتى يا كل ما ليا يا.. يا... يا....

أسراء : ....................

السايبرجى : على فكرة الطقم الى انتى لابساه ده هينطق عليكى، جامد جداً يا بنت الأيه

أسراء :...................

السايبرجى : طب بقولك ايه، مافيش بوسة تصبيرة ، ألو ألو، أسراء أنتى فين، ألو ألوووووووووو

تيييييييييييييييييييييييييييييت


ودى كانت نهاية قصة الحب الى ولعت فى سلك النت، وأنا كنت سامع الحوار كله لأنى للأسف كنت قاعد على الجهاز الى جنبه وششششش
وعلمت أيضاً أنه يجلس على الجهاز منذ الواحدة ليلاً وكانت الساعة وقتها 12.30 ظهراً

أما إن أخبرتكم بالموقف التالى فسوف تلتمسون العذر لذلك الشاب مجنون أسراء، وهو ليس ببعيد عنه فهو رجل فى منتصف الأربعينيات من العمر يجلس بجوار الشاب، من الواضح انه بيعمل شاااااات ، وبالمايك أيضاً .

دخل السايبر حوالى الساعة التاسعة و الربع، ليجلس على الجهاز وقام بفتح ايميله، وبدأ الحديث عادى جداً محترم بعكس ما يوحى مظهره تماماً، وفجأة بدأ بشتم وسب شخصاً تبين من خلال حديثه أنه خليجي، ومنه إلي آخر ليظل يسبه، بل وأنه طلب التحدث مع فتيات وذلك فى المايك العمومى لغرفة الشات ، و المصيبة أنه كان فخور جداً ويقول لهم " أنا مصري يا ولاد التيييييييييييييييت، يعنى أحسن ناس، حد ليه شوق فى حاجة " كنت أتمنى فى تلك اللحظة ان أقول له، عيب عليك يا أونكل الى بتعمله ده ، ده أنت حتى راجل كبير"


منذ معرفتى بالشات وحتى الآن أحاول معرفة ما المتعة القابعة بداخل غرف المحادثة، وخاصة عندما ( يشتغلك ) أحدهم، فتكون أنت غارقاً فى قاع الأوهام بينما هو يكاد يطير من الضحك عليك وفرحته بنجاحه فى أشتغالك .

وأحاول أيضاً معرفة الرابط بين جمع كلمة شات ( شاتات) وبين ما تسببت به من إحداث حالة من الشتات و الإغتراب بين أفراد الأسرة المصرية، أو نقوم بجمعها على طريقة الفرانكو آراب ( بطريقة مختلفة عموماً) فستصبح " شاتس تحرف إلي شيــــتس" يعنى لعنات باللغة الأجنبية، فأما نعتمد نظرية المؤامرة، وأما نبحث عن مخترعها لمعرفة أصولها .
فتلك مهمة جديدة كمهمة السر فى تسمية وسط البلد بوسط البلد