الناس دى أصيلة .. ولازم أنكد عليهم بفيديو رخم شوية من الفيوم

للأسف ... الجميل

صدقتوا فى تعليقاتكم
وماعرفتش أبطل كتابة .. حتى في شغلى كنت هخليه شغل إداري بس لو ينفع ولو ما كانش هينفع كنت هسيبه خالص علشان أبعد عن الكتابة عامة ... لكن برده و الله ما أقدرتش أخرجها من بوووؤؤؤؤؤي
عموماً .. أنا هكتب وهفضل أكتب لغاية ما أموت إن شاء الله
وبعد كدة حتى لو قولت قولولى أنت كداب يااااض وبووؤ
..
أستاذي العظيم / عصفور المدينة
شكراً على كلام حضرتك إلي بجد خلانى فكرت فيه كتير
شكراً لحضرتك.
..
محمد حمدي
أدينى قابلتك أهو وقابلتك بفشل برده ... فشل فى فشلي فى الأمتناع

وأووووبااااا .... أوباا .. أوباا .. أوباا
أنا دلوقتى ماسك الشنطة وطالع على أوروبا
ههههههههههههههههههههه
..
أختى الصغيرة الى أكبر منى / آآآآبى كولومبوس
هقابلك فين وأنتى مخصمانى
بس أسمعى حتة الرااب دى

هفضل أكتب وأعيد وأزيد للأبد
هكتب وأقول كلام كبير علي أيدنا أتولد
كلام عظيم من شأنه يعيش للأبد
ومن غير ما أتعدي حدود الأدب
الكل يقدر يسمعه .. أب ، أم ، بنت كانت أو ولد
..
أختـــــــي الغالية / عـــاشـقـة الفـــــــردوس
بصراحة مش عارف أقولك أيه
بجد مش عارف
انتى بكلامك ده كنتى أحد العوامل الرئيسية إلي خلتنى
أخرج من المووود المقرف ده
والى مش عايز أرجعله تانى أبداً

أنتى وناس تانية كتير أصلاء .. ودايماً الأصل مش بيبان ألا في وقت الشدة
أنتى أصيلة يا عاشقة الفردوس
مهما كتبت .. والله مش هوفيكى ولا هوفى أى حد حق كلمة واحدة قالها .
جزاكي الله خيراً يا أختــــــــــــــــــــي الغالـيــــــة
..
بسمــة مسلم

كلمتك بتاعت مادام فيا نبض لازم أشتغل
ضافت لروحي المعنوية كتير
كتير أوي ... وشكراً على انى استهلكت جزء من وقتك فى كتابة الكومنت
ربنا يجزيكى خير إن شاء الله
..
جنــــــي
أنت تعرف أنى ماكنتش بفكر في أى حاجة
لا مهم ولا أهم ولا أى حاجة
أحساس وحيد مسيطر عليك .. الحزن والكآبة الى انا بكرهم أساساً
وعارف بسبب أيه
بسبب كلمة .. سطر بالظبط فيه كلمة هى الى وجعت اوى
وشكراً على دفعك لي ( كدة وقعتنى من على السلم) ههههههههههه
..
البنت الشرانـــية
يا بنتى حتى فى بوست الكآبة .. داخلة وش كدة عالطوول
خدينى على الهادى .. واحدة واحدة
هههههههههههههههه
وده طبعاً شرف ليا أن سيدتك بتنزلى وتركبى مواصلات مخصوص وتيجى تزورينى فى البلوج
ده حتى الحكاية دى أدتنى دفعة قوية
قوية جداً جداً
بس نحو التفكير الجدي في الأنتحار
ههههههههههههههههههههه
بس رجاء خاص يا شرانية انتى .. أوعي تدخلى تعلقى عند حد مكتئب تاني
بأمانة ... هينتحر
ههههههههههههههههههههههههههههههههه
شكراً يا بنت أنتى يا بنت
...
بشمهندسنا .. حبيبنا
مش حكاية البديل خالص
ببساطة لأنى فى عشرينات دلوقتى
ومن فترة كمان .. روحت قفلت البديل وطلعت على عشرينات
هههههههههههههههههههههههههههههه
اوعى تصدق انا ماشى من قبل الأزمة دى بفترة كبيرة
هشوفك النهاردة إن شاء الله
..
مايكل
يا ريسنا انت بتدقق في حاجات فاتت
يا أبنى خلى عندك أمل وتمسك حتى آخر خيط فى السجادة
وبلاش تكتئب .. علشان الأكتئاب هو الى بيؤدى إلي فشل حقيقي
ههههههههههههههههههههه
ده انا الى بنصحك . هاا
بس مسيره هييجى اليوم

بتوع الأنتر فيو أتصلوا بيك
:]
..
نونا
أكيد كل حاجة بتبقى سلاح ذو حدين
لو زادت عن حدها بتقلب بنتيجة عكسية وكذلك لو قلت عن حدها
كلامك جميل جداً بجد
ومفيد .. وهطبقه بالتأكيد فى الفترة الجاية من حياتي
شكراً جداً علي أهتمامك
..

انتوا بقى عارفين انتوا عاملين زي أيه
عاملين زى السيمفونية الموسيقية فى تعليقاتكم
لأنى لو أخدت من كل كومنت بتاع واحد فيكوا كلمة وحطتها على كلمة من كومنت تانى
هتطلع سيمفونية متكاملة وجميلة جداً
:D .... مشوا الوش ده أنه رافع الأبهام بتاعه .. كأنوا بيقول انتوا كدة ... مشوها كدة بقى

انتوا ناس جااااامدة من الآخر ... وشايفين البنت الشرانية دى بتعمل فيا أيه

شوفوا بقى أحداث جامعة الفيوم .. فيديو لضرب وسحل الطلاب المتظاهرين

انا مخنوق .. لأنى فاشل :D

مش عارف أبتدى منين وأنتهى فين .. كل إلي أعرفه انى تراجعت

تراجع مخيف .. عارف لما تكون فى قمة حماسك .. وبعدين تحس أن أداءك بيقل ويقل ويقل

وانت عمال بتدور علي السبب علشان تلحق المصيبة الى انت فيها ..

وفى نفس الوقت التراجع مستمر و أداءك فى الهابط يوم عن يوم .

حاجة كدة عاملة زى المقولة بتاعت .. ان الوصول للقمة مش صعب .. لكن الصعب هو انك

تحافظ عليها .

حاجة زى كدة يعنى

طب ده انا فاكر مرة .. انى كنت فى شغل ما .. واتقال ان عددنا كتر وهنتصفى على حسب الأحسن

وانا كنت فرحان جداً بالشغل ده وبحبه او بعشقه بمعنى أصح لغاية ما انا وهو بقينا اتنين فى واحد

تخيلوا انى ركزت فيه لدرجة انى حلمت ان حد بيدبحنى بسببه .

لدرجة انى ماصدقتش نفسي انى قدرت أركز التركيز الى يوصلنى للمرحلة دى

وربنا ستر وماكنتش من ضمن الى أتصفوا .. وبيتهيألي مافيش حد أتصفى من الأساس .. وأعتقد انه كان أختبار

او أستفزاز للقدرات .

بعدها بفترة قصيرة ربنا كرمنى فى نفس الشغل ببوزيشن ثابت مع ناس ما أعتقدش أنى ممكن ألاقي زيهم مرة تانية .. ناس

بتنصحك

بتوجهك

بتعلمك

وراعوا ان البوزيشن بتاعك الجديد ما يأثرش على شغلك الى انت بتحب تعمله أساساً

وفروا لك كل ما تحتاج

ومش مستنين منك حتى كلمة شكراً

..

وبعد كل ده

بقيت مهمل عن طريق تركيزك في حاجات تانية هايفة وأبعد ما تكون عن نطاق عملك

أهملت حتى فى شغلك الى انت بتحبه في الأساس

..

عارفين

الإعتراف بالخطأ دايماً مفيد وكويس

بس لو واحد بعتذر وبكرر

هو ده الخطأ الحقيقى .. وخاصة انه نال العديد من الفرص

ولازمله قرصة جامدة تفوقه

فهل يستحق ان يكون فى ذلك المكان .. وهل يستحق الناس دول ؟

هل يستحق فرصة تانية؟ ولا يكتفي بالفرص الى ضاعت ؟؟؟

هل يستحق المواصلة ؟

..

مع العلم أنه أنسان فشل حتى فى الحاجة الى حبها .. وسعي دايماً وراها .

ولما جتله .. راح هو رماها .

نتوقع ايه من أنسان فشل وفى أيه ... فى حاجة هو حبها

...............

انا عن نفسي بقى

كنت بفكر اتوقف عن الكتابة بجميع أنواعها سواء كصحافة

او كتدوين او أى نوع من الكتابة عامة

لأنى أكتشفت انى فاشل زى أخونا الى فوق ده .

وأعتقد ان ده الغالب .

أشوفكم .. مش قريب

سلام .

طلاق جميلة إسماعيل من ايمن نور _+ فيديو رأي الشارع

تباينت ردود الأفعال عقب سماع خبر طلاق جميلة إسماعيل من أيمن نور
بين الغير مقتنع بذلك الخبر معتبراً أياه إدعاء من ضمن الأدعاءات ( أياها)، وهناك من أعبره كذبة أبريل ، وبين المتردد وبيتسائل طب هى ليه جميلة ما طلعتش تكذب الخبر لو هو غلط وايه الى يخلى أيمن نور يتكلم بقلب جامد أوى كدة أن الكلام ده محصلش ، وأيه الدلائل الى فى ايد مجدى الجلاد علشان يتحدى جميلة انها تطلع تكذب الخبر على الهوا .
؟؟

رصدنا القليل من الأراء ، من خلال جولة فى شوارع وسط البلد
...
الفيديو نقلاً عن موقع عشرينات


JUBA

6أبريل 2009 _ مش هنسيب شبابنا فى زنازينكم

أفرجوا عن الشباب بقى ربنا ينتقم منكم
اولاً : النائب العام بتاع نيابات كفر الشيخ طلع حرااامى زى بتوع أمن الدولة بالظبط
وطلع متحيز لأمن المخروبة
ولما المحامين راحوا ليه علشان يشتكولوا ويقدموا بلاغ بضربهم فى الشاارع !!! أيوة و الله
المحامين أنضربوا في الشارع من بلطجية سرقة الدولة
فزعق فى وشهم وقالهم .. مهو انتوا الى جايين من القاهرة لغاية هناعلشان تدافعوا عن بنتين بايظين
البنتين البايظين دول كل الى عملوه أنهم كانوا بيوزعوا بيانات داعية للأضراب فى 6 أبريل
وأتوجه لهم تهم التحريض على قلب نظام الحكم !!!!!!!!!!! قلب نظام الحكم
أياكش يطلع قلبك يا بعيد
للدرجة دى النظام بقى ورق وهش وخايف من حتة ورقة تعمل أنقلاب
مهو لو ماشى صح هيسلك ومش هيخاف
الله يخرب بيوتكم .. الله يخرب بيوتكم
خلتونى بتكلم كأنى قاعد على المسطبة .. الله يخرب بيوتكم وأن شاء الله تشوفوه فى عيالكم

على فكرة البنتين خدوا إفراج بكفالة مش عارف الف ولا اتنين

شباب6 ابريل:مش خايفين من الاعتقال

من فضلك شارك فى التصويت الى على أيدك الشمال
وحاسب البلاعة المفتوحة
....

شباب6 ابريل:مش خايفين من الاعتقال

محمد جمال الدين – ولاد البلد – عشرينات -4/4/2009

قبل يومين من 6ابريل، اليوم المعهود الذي أعلنه المصريون يوما للإضراب العام، للعام الثاني على التوالي، قامت قوات الأمن بدورها- لتلحق البلاء قبل وقوعه- وذلك بالقبض على مجموعة من شباب 6 ابريل ، حيث قامت باعتقال ما يزيد عن 15 من أعضاء الحركة، صباح اليوم السبت 4 ابريل ، وذلك بعد الإعلان عن اعتصامهم أمام مجمع محاكم كفر الشيخ . جاء اعتصام الشباب في إطار الإحتجاج على اعتقال أمنية طه، وسارة رزق، الأعضاء بالحركة، ظهر الأربعاء الماضي من داخل الحرم الجامعي بجامعة كفر الشيخ، على خلفية توزيعهما لبيانات داعية للإضراب المقبل، وقد قامت نيابة كفر الشيخ اليوم، بتجديد حبسهما 15 يوماً على ذمة التحقيق..

متوقعين ومش خايفين

وحول ما يحدث من اجراءت أمنية قال أحمد ماهر، مؤسس حركة شباب 6 أبريل : " من الطبيعي جداً أن يتخذ الأمن ذلك الإجراء التصعيدي ضد الحركة، بهدف منع الإضراب، كنا متوقعين لذلك التصعيد منذ اليوم الأول للدعوة". وحول تأثير ذلك علي سير أحداث فاعليات يوم 6 أبريل، أفاد ماهرً " بالتأكيد، سوف يؤثر ذلك بصورة أو بأخرى، ولكن لن يصل إلي حد إلغاء الفاعليات المنتظرة والمعلنة ، سوف نستطيع سد الفراغ الذي خلفه المعتقلون، في حالة لم يتم الإفراج عنهم خلال الساعات القادمة" و أضاف ماهر:" نجاح الإضراب العام، أو فشله لا يتوقف على الحركة فقط أو حزب الغد الذي أعلن مشاركته بكل طاقته وإمكانياته وقوته ، بل يقع العامل الأكبر في نجاحه على المواطن العادي، وبالتالي لن يكون هناك فرق سواء اعتقلوا جميع الداعيين للإضراب أو تركوهم". وأنهى ماهر حديثه مؤكدا أن دعوة الحركة للإضراب وصلت الشارع المصري الذي يستطيع إنجاحه أو رفضه، مشيرا إلى أن الأمن لم يتعلم من الإضراب الماضي، وواصفا الإضراب القادم بالأقوى.

الخط الأحمر

وأفاد عبد الرحمن فارس، أحد شباب الحركة، قائلاً " إذا كان الأمن يعتقد بأنه بتلك التصرفات سوف يثنينا عن فكرة الإضراب العام، فهو مخطئ فنحن نؤمن بما نفعله، ونراهن على الشعب المصري، ونؤمن أيضاً بأن الشعب لن يترك أبنائه في المعتقلات و السجون، في حالة أن ألقى الأمن القبض على جميع أعضاء الحركة ". ومن جانب آخر، ترددت أنباء عن نقل والدة سارة رزق-التي القي القبض عليها الأربعاء الماضي- و أختها إلي أحد المستشفيات بعد إصابتهما بانهيار عصبي، عقب سماعهما قرار التجديد بــ 15 يوماً . وهددت الحركة في بيان لها بعنوان ( وصلتنا رسالة أمن الدولة ، وردنا سيكون في 6 أبريل)، بتصعيد الوضع، إلي أبعد ما قد يتخيل الجهاز الأمني، واصفين اعتقال الفتيات بــ"الخط الأحمر".

أسماء المعتقلين

أما عن هوية بعض الذين تم اعتقالهم اليوم وفقا لبيان أصدرته حركة شباب6 ابريل فهم : 1-دعاء محمد
2-سارة احمد
3-مدحت شاكر
4-شمس الفخاخري
5-محمد عواد
6-نور الدين حمدي
7-احمد النديم
8-محمد السباعي
9- عمرو عنين
10-احمد الغيطي
11-محمد البرهامي
12-محمد حماسة
13-على سالم
14 - 15 بنتين لم يتأكد من اسمائهما بعد
16- المعتصم بالله محمد
17- علياء جلال

ومازال العدد فى زيادة مستمرة حتى الآن
كما تم ألقاء القبض على ما يقرب من 26 شخصاً كانوا فى محيط مجمع محاكم كفر الشيخ

WWW.20at.COM
WWW.MASR.20at.COM