اوبا ياما .. بقى ريس ازاى

من ساعة ما مسك اوبا ياما الرئاسة وانا عمال أسأل نفسى سؤال .. ومع انى متأكد ان الاجابة بسيطة ومش من المحال .. لكن للأسف لحد دلوقتى بفكر،ومش لاقى حل للسؤال.
هو ليه العرق الاسود، الافريقي نجح فى تسيد العالم .. برغم ما مر به من أضطهادات وعنصرية كانت زمان بتتم تحت سمع وبصر وتأييد الشرطة الامريكية و أنبهرت لما شوفت الناس دى استطاعت الوصول تحت ضغوط رهيبة و عنيفة .

وقولت لأنا هو احنا ليه يا أنا مش بنعرف نعمل زى الناس دى ونطالب بحقوقنا
ومش مجرد مطالبة وشعارين يترفعوا وخلاص ننسي ، لأ ، انا بتكلم على
مطالبة حقيقية وعن يقين بحقوق كثيرة جداً مهدرة للمواطن المصري
أنا قالتلى " علشان الناس دول تقفيل بره، يعنى بتوع بلادهم ، وعليهم ضمان دولى كمان، وما بيكسروش، وفى حالة انهم بيطالبوا بحق من حقوقهم بيبقوا عندهم أستعداد ينضربوا ويتسحلوا ويموتوا علشان ياخدوا حقوقهم
لكن أحنا فى مصر، بنطلع شايلين كام يافطة مكتوب عليها احنا عايزين ايه
وده صح مش غلط
لكننا بنفتقد لأهم عنصر وهو الروح، روح الانسان الشغوف بالحصول على حقه
روح الانسان الى طالع ومقتنع ان الى بيعملوا هيقدر يجيبله حقه المهدور "

ما براحة عليا يا أنا ، مهو برده الشعب غلبان والحكومة مستهبلة ومستغلة الحكاية دى
فى انها تطحنه وتسرقه اكتر، ولما تكون الحكومة فى مصر مازالت تتعامل بالمحسوبيات و الوسطاء
يبقى لازم تكون اكثر الدول تخلفاً هى الاكثر تقدماً وازدهارً نسبة إلي مصر
بس انا لسة مش عارف .. هو ازاى اوبا ياما وصل لأنه يبقى رئيس أمريكا، وينتخب من اغلبية امريكية
هل لأنه كان بيدى الواد عبده السالك كبشة فلوس ويقولوا روح اشتري ليا بيهم اصوات من الصيدلية
ولا لأنه كان مظبط مع صبحي صندوق علشان يزورله فى الاصوات
مرة واحدة .. لقيت أنا بتزعق فيا وتقولى
" انت فاكر نفسك فين، وبتتكلم عن مين ، لا تكونش افتكرت ان اوبا ياما ده فى مصر عندكم
ده انا قاعدة فى امريكا مراقبة كل خطوة .. مافيش تزوير ولا حد بيشترى اصوات ولا حناجر
هنا فيه شعب دفع ثمن حريته ، فاستحق ان ينولها .. شعب لما بيتظاهر بيبقى عنده استعداد يتسحل بس ياخد حقه وحكومته تعرف انه مش نايم .. عارف ليه .. لأنه مش شعب أناني مش بيصنع التغيير لنفسه
لكنه بيجاهد علشان يصنع افضل حياة لولاده واحفاده .. وعلشان كدة هو دلوقتى عايش وواخد حقوقه
اسمعها منى كلمة .. طوول ما أمين الشرطة بيسحب منك بطاقتك .. ويديك على قفاك و انت تقوله صباح الفل يا باشا
وطووول ما انت بتروح تدفع رشوة علشان تاخد دور غيرك وتخلص شغلك بدرى
وطوووول ما لسة فيه محسوبية وبتسرق دور غيرك فى التعيين
وطووول ما المصري ما بيفكرش غير فى نفسه وبس وماشى بمبدأ مادام بعيد عنى انا مالي
وطووول ما فيه ناس عايشة و متأكدة انها فوق القانون وهى كدة فعلاً
يبقى عمركم ما هتتقدموا خطوة واحدة .. واخركم لما تكونوا عايزيين تعلوا .. هترموا نفسكم فى النيل بحجة انكم عايزين تتسلقوا الكوبرى بتاع قصر النيل .. قال ايه علشان تعلوا .. وهتغرقوا قبل ما تعلوا

انا مش عارف حاجة فى اى حاجة .. كوبرى قصر النيل ايه وأنا ايه الى انا بكلمها دى
وسيادة الباشا الأمين .. روح اجرى يا ولاه هات علبة سجاير للباشا .... صباح الفل يا باشا
انا كان محكوم عليا بالاعدام .. ممكن اتقل عليك وتجيبلى فيش أبيض بس يكون بالالوان
مهو أصل سيادتك عارف بقى أن عمايلى السودا بتبان .. فى وقت الاستحمام