منوعات : و لقائى بالصباغ

انتوا عاملين ايه فى البرد ده ؟ اكيد انتوا كويسيين

طبعاً عن نفسى كل يوم و انا بصحى الصبح بفتكر الاعلان بتاع ليبتون

هو اينعم ليبتون فى المقاطعة لكن الاعلان خارج المقاطعة

فى الاعلان تلاقى ... واحد صحى من النوم و المرتبة تبع السرير لازقة فيه

يروح يغسل وشه برده المرتبه معاه ... و لغاية ما يروح الشغل برده بالمرتبة و المفاجأة

انه بيلاقى كل الى فى المكتب جايبين المراتب تبعهم معاهم ... و كل ده علشان ما بشربوش ليبتون

انا بقى بفكر اخد البطانية تبعى معايا .... هو ممكن اكون بخدها معايا بس فى صورة الدولاب بتاعى

يعنى بكون لابس الدولاب و ماشى ... ده مش عالطول طبعاً .. بس فى اوقات البرد الى حد التجمد

المهم انى كل ما افتكر الاعلان ده افضل اضحك اوى ... فى اى مكان و اى وقت

و ما اقول لكم ... انا من النوع الى استحالة اعرف امسك نفسى لو كنت عايز اضحك او شفت حاجة تتضحكنى

المهم ...برده انى اكتشفت حاجة فى البرد ده .. هى مش جديدة و لكن لما بتكتشف حاجة بنفسك بتبقى احسن

اكتشفت و بدماغى العبقرية و لانكوا عارفين انى متواضع يبقى نقول الدماغ الفذة بس .. اوك

ان ذكر الله و حركة الفم اثناء ذكر الله فى البرد بتساعد على تدفئة منطقة الوجه

بمعنى انك لو مشيت و غنيت مثلاً هتلاقى ان البرد زى ما هو و هتحس ان عضلات الفم بتتجمد

اما لو ذكرت الله ... هتحس ان منطقة الوجه بتدفى ... جرب و شوف و قولى

...

من يوميين كنت مع الصباغ قابلنا بعض و قعدنا شوية مع بعض نحكى

و نقول النوادر بتاعتنا و فيه موقف بقى بعد ما سيبته قعدت اضحك عليه اوى او على نفسى يعنى

و احنا قاعدين على الكافى بتاع ابو مرسى ولا مش عارف مين ... و فيه كلب اسود شكله كدة يخوف معدى

راح الصباغ بيقوله .. شششششششششششششششششششت ...

لاقيت الكلب راح وقف ... بص اوى كدة و مشى .... راح الصباغ تانى شششششششششششششششششششششششششت

راح الكلب وقف و رفع ودانه و بيبصلنا اوى كانه عايز يقول .. انتوا هتشتغلونى ولا ايه ؟

رحت انا قولتله بقولك ايه يا صباغ " سيبك من الكلب علشان شكله شرانى " ولا كأنى بتكلم

ششششششششششششششششتتتت

راح المعلم وقف ... و كشر و شكله هيجى ياكلنا احنا الاتنين ...قولتله " على فكرة الكلب لو جه يجرى علينا انا هسيبك و انت تتعامل معاه بقى " تتخيلوا يقولى ايه ؟؟؟؟؟ "مفاجأة بجد

" انا اصلاً بخااااااااااااف من الكلاب انا كمان ... هتلاقينى معاك "

يااااااااااااااااااالهووووووووووووووووووووووى

و عمال تقوله هششششششششششششششششششششششششششششششششششششششت حرام عليك

بس الصباغ ده شخصية لذيذة اوى و جدع و من الاشخاص الى تحب الحكى معاهم و انا ساعات بكون رغاى بس مع الى بحبهم بس

.........................

فى بقى حاجة ثابتة لا تتغير بتضحكنى كل ما افتكرها و بجد مش بعرف امسك نفسى نهائى

و فين ..؟ ... فى العزاء

انا عارف ان العزاء له احترامه طبعاً لكن و الله بيبقى غصب عنى و علشان كدة باخد نفسى و اروح اى حتة بعيد

كل ما بفتكر يحيى الفخرانى فى فيلم الكيف .. و هو قاعد فى العزاء و بيفك القميص و عمال بضحك و خلى الناس كلها تضحك

بجد ... بمووووووووووووت على نفسى من الضحك

...

من يومين كنت راكب الليموزين تبعى " المينى باص " و قاعد فى امان الله و جنبى كرسى فاضى

و طلع راجل كبير " حاج" و ابنه بتاع 10 سنين كدة ... المهم ان الراجل سايب الكراسى الى فاضية كلها و عايز يدخل يقعد على الكرسى الى جنبى ... اتفضل يا عم الحج و قومت وقفت علشان يدخل هو و اقعد تانى

راح ابونا الحج ينادم " ينادى " على ابنه و عايزه يقعد مكانى و بيقول له : تعالى اقعد هنا و خليه هو يقعد هناك

انا طبعاً مش بحب حد يأخد منى حاجة غصب عنى ... يعنى على جثتى

روحت قايل له ... يا عم الحج ده الكرسى بتاعى و ده مكانى ... راح مزعق فيا و بيقولى ما تقعد على اى كرسى تانى

و انا طبعاً بكل هدؤ لانى مش هينفع اتنرفز عليه و انا عارف نفسى لو اتعصبت خلاص : قولتله تانى يا عم الحج ده الكرسى بتاعى

قاللى طب خلاص عايز تقعد خش انت اقعد جوة ... قولتله للمرة التالتة : يا ابويا الحج ده الكرسى بتاعى و الى انا كنت قاعد عليه

قاللى لا .. عايز تقعد خش جوة !!!!!!! ..... يعنى انت شايف كدة يا عم الحج

ايــــــــــــــــــــــــــــــــــــــــــــــــــــــوووووووووووووووووووووووة

طب اتفضل يا عم الحج ... قولتله كدة و رحت قاعد على كرسى تانى وراه

لانه لو هيطلع العرق الصعيدى انا كمان صعيدى ... و العملية هتبوظ خالص

المهم بعد ما قعدت لاقيته التفت لي و بقولى .." بعد كدة ابقى كلم الناس بأحترام "!!!! ... طبعاً مش عارف ارد عليه

لانى لو رديت عليه و انا من جوايا بغلى هيبقى رد لا يليق برجل مسن و انا مش عايز اوقع نفسى فى غلط

قولتله انا اسف يا عم الحج

اتعلم الذوق

انا اسف يا عم الحج

اتعلم تكلم الاكبر منك ازاى

حاضر يا عم الحج

اهى المرة دى تعلمك بعد كدة .......

حااااااااااااااااضر يا عم الحج ... انا اسف لك يا عم الحج ......... ااااااااااااااااااااااااااااااااااسف

طبعاً قولت الكلمتين دول بصوت معتدل يعنى و الحمد لله ... لا رفعت صوتى عليه ولا بتاع بس كان فيه نبرة حادة شوية

خلته يقعد ساااااااااااااااااااااااااااااكت لم يتفوة بكلمة بعدها

طب انا بقى اعمل ايه ؟ و ده مش راضى يسكت ... كان لازم اوريه انى مش عاجز عن الرد من خلال النبرة الحادة و المحترمة و لله الحمد

يارب البوست يكون عجبكوا

و انتظروا بوست يفرحكوا بجد خاص بى شخصياً

بس ادعو لى ارجوكم

juba