هو أستعراض ولا أستظراف ولا عته

اكثر ما يمكن انه يضايقك فى المترو أنك تلاقى واحد قاعد بينظم المرور

والكرسى الى جنبه يفضى يروح منادى واحد من آخر الدنيا علشان يقعد

مع العلم أن فيه ناس واقفة قدام الكرسى ده .. ومع العلم برده أنه لا يعرفه ولا حاجة

يعنى غتاتة ورخامة ورزالة بس ..

والتانى تحس أنه وهو بيعدى بيلمع جزمته فى بنطلونك

وأرخم مافيهم بقى .. إلى يطلع ويتسمر على الباب .. ومايرعيش ان فيه ناس طالعة وراه

وتكتشف فيما بعد وانت نازل انه لسة متسمر على الباب و منزلش ولسة قدامه مشوار

أما الى بيستظرف بقى .. ده الى مشكلة او الى بيقول حاجة مش منطقية

زى مرة كان فيه واحد واقف على الباب .. بقوله بعد أذنك هو حضرتك نازل المحطة الجاية

راح يقولى .. اومال انا هقف على الباب من غير ما اكون نازل يعنى .. وبيقولها كدة بأستهجان

روحت قولتله .. مهو انت برده مش معلق ورقة على ظهرك مكتوب فيها انا نازل يا جماعة

راح سكت خااالص .. وأحسن علشان ساعتها كنت لسة جااى من البودى بيلدينج ومرهق

وفيه حاجة بقى انا مش عارف انتوا مؤيدين لى فيها ولا أيه رايكم

لا خلاف على ان القرآن هو من أروع ما يسمع فى العالم كله

لكن الحكاية وما فيها ان فيه ناااس بتطلع المترو و تروح فاتحة سماعة التليفون

الخارجية و تشغل قرآن وطبعاً بصوت عالى بدرجة أنه بيبقى الصوت مش واضح أساساً

ونفس الحكاية على الشباب الهااايف جداً إلى بيعمل نفس الحكاية بس بيشغل أغانى

الحكاية مش فى المادة الى شغالة

الحكاية فى الاسلوب ات نفسه .. غير حضارى .. وتحس أنه بمبدأ الإجبار

طب أفرض واحد مش مسلم ولا واحد مسلم بس مش بيستحمل الصوت العالى و قاعد جنبك

يا جماعة انا بحس ان الناس دى بتستعرض أكتر ماهى متواجد لديها نوايا اخرى

زى الشيخ بتاع الكاريكاتير

فيه اختراع أسمه الهيد فون .. لو عايز تسمع اسمع الى تسمعه بس لوحدك

اياً كان ... لكن يبقى فيه دى جى شغال جنبى .. وتلاقى بقى حفلة فى العربية

كل واحد مشغل حاجة ومعليها على الاخر كأنه سباق واستعراض

على اليمين قرآن وعلى الشمال هيفاء واجرى ...... وقدامك عالطوول .. شغالة مواقف مضحكة ونكت

يعنى من الآخر لو جالك تليفون .. لو رااااجل تعرف ترد عليه

دى جى .. بكل معنى الكلمة

مش عارف انتوا رأيكوا أيه فى الموضوع ده

آه .. وعلى فكرة .. دلوقتى بقى فيه غرامات على الحكاية دى

اى حد هيتقفش سواء مشغل قرآن او اغانى بصوت عالى ومسموع هيدفع غرامة

لأن ده بيعد أعتداء على حق الغير.. هاتلك هيد فون يا أخى

وإلى يغيظ اكتر انه بيبقى معاه هيدفون ومع ذلك بيشغل السماعة الخارجية

لاحول ولا قوة ألا بالله

NIDAAL