أسكتوووووووووووووووووا
مش " اوغو شافيز" طرد السفير الاسرائيلى النهاردة من فنزويلا
مع انه قبل ما يطرده ويرميله هدومه على عتبة الحدود بدقايق كنت بكلمه
و كشف لى على الى فى نيته والى مخبيه من ساعة ما الهولوكست الاسرائيلية بدأت
بس انا حاولت أقنع فيه و جبتهالو من جميع النواحى
وقولتله يا خويا يا شافيز بكرة الضرب هيقف ومالهاش لازمة حكاية الطرد دى
شافيز : لا يا رفيق نضال مش هينفع .. دول نازلين طحن فى الناس الغلابة و آخرها يضربوا مدرسة هما الى قايلين للمدنين اقعدوا فيها
أنا : طب بلاش دى .. انت الأقتصاد بتاعك مش ماسك نفسه و هما كدة ممكن يبهدلوك على الاخر ما أنت عارف مين الى متحكم فى الاقتصاد بتاع العالم
شافيز : لو شعب فنزويلا كله هيموت من الجوع انا برده هطرد سفير الندامة بتاعهم ده ..و غير كدة شاكله بينرفزنى وخلى بالك يا رفيق أنت مش مسلم ولا أيه وربنا وحده هو الى بيرزقكم
أنا : طبعاً و مين هيرزقنا غيره
شافيز : خلاص انا بعمل كدة علشان دول يهود وصهاينة عمرهم ما بيجوا بالذوق أبداً ولا بمفاوضات وربنا عالم انا بعمل كدة ليه
وانا كمان مش حامل هم اى حاجة .. ومش انتوا بتقولوا عندكم فى مصر .. ان ماحدش بينام من غير عشا
خلاص .. فنزويلا علشان عملت خير يبقى مش هتنام من غير عشا
انا : يا شافيز يا ابن عمى انا خايف عليك من أمريكا واسرائيل يتكاتروا عليك و يحطوا عليك بضمير و ما تحطش فى بالك ان ساعة الجد ممكن تلاقى حكومة عربية واحدة واقفة جنبك .. دول بيبيعوا يا حاج شافيز وقتى
لكن لو مستعد تديهم ملايين ممكن يبقى فيها كلام تانى
شافيز : أحنا بعون الله لا بتفرق معانا كترة ولا بتاع يا عم الامور ... احنا بنخلص عالطوووول
أنا : و الله انا خايف من نغمة الثقة دى أصل سمعتها قبل كدة من الله يرحمه صدام و ماشفتش حاجة
وسمعتها من الله ياخد بأيده لفوق حسنى مبارك وهو بيتكلم عن تحسين احوال المواطن و حسيت انى هتنغنغ او على الاقل خلاص بقى هبقى بنى آدم و فرحت اوى ... بس يا خسارة يا ريتنى ما فرحت
شافيز : ليه كدة خسارة ليه.. أيه الى حصل ؟
أنا : علشان انا كنت قبل ما يلقى الخطاب فى مستوى بين الحيوان والانسان ..ولكن بعد الخطاب بقيت أدنى من الحيوان
كأسلوب معيشة .. وغير الى بيتعذبوا فى اقسام الشرطة و حاجات تانية كتير مش عايز ادوش دماغك بيها انت راجل داخل على منعطف تاريخى
شافيز : لا متقلقش .. من ناحية الثقة اطمن .. احنا لا بناخد معونة ولا بتاع ولو بناخد مش عايزنها
أحنا مش زى حكام العرب .. مربوطين بسلسلة فلوس .. وكل الى يهمهم هما أزاى يأخدوا الفلوس من على كل السلسلة
لكنهم مش بياخدوا ألا الى عند بقهم بس ومش بيطولوا الباقى لأنهم مربوطين
و ما تقلقش .. أحنا جامدين اوى أوى أوى
أنا : طب ما تفكر تانى يا نجم .. أقولك .. هات الواد السفير ده ووجه له رسالة شديدة اللهجة زى ما الى عندنا بيعملوا أوأديلوا فوق دماغه لغاية ما يبانله صاحب
شافيز : انا مش عارف ليه انت مقتنع اننا زى العرب ..
أنا : يا عم بلا قرف .. تف من خشمك
شافيز : احنا يا أما نعمل حاجة كرد فعل على الفعل .. يا أما ما نعملش و ما نتكلمش خالص
اديكم اهو .. بقالكم من اول ما بدأت المجزرة وانتوا مش عارفين توقفوها .. خليكم .. أشربوها بقى
قال مجلس أمن قال .. أهو عجز عن حل المشكلة .. لما مجلس الامن يعجز عن حل المشكلة طب مين الى يحلها بقى
يا عم دى بقت كوسة و العالم بقى عبارة عن شوية تييييييت لا عارفين ينهوا ولا يأمروا
وكفاية كدة بقى علشان ما ارفعش سماعة التليفون و أولعها بلى فيها و اولع فى نفسى انا كمان
أنا : لا ياعم أستهدى بالله كدة وروق ... لما تولع فى نفسك اومال مين الى يطرد فى الاسرائيلين ويحرق دمهم
شافيز : هسيب المهمة للعرب بقى
انا : هاهاهاها .. نئبك جه على شونة ... طب شوفلك حد عدل تقدر تعتمد عليه
مش رايحلى على حكام بطرح و الطرح استعرت منهم من زمان
شافيز : انت يلاه ... أنت دوشتنى .. كان زمانى طردت السفير من بدرى .. سلام يا رفيق نضال
انا : ماااشى يا عمنا .. حقك ومين قدك بقى .. طردت السفير الاسرائيلى ولا منك بتاخد معونة كبيرة ولا منك مقيد بأتفاقيات ولا منك بتاع كاش ولا بتاع .
شافيز : يا رفيق أنا لو مكانكم انا كنت حاربت من زمان .. يعنى لما 60 واحد يموتوا على الحدود برصاص صهيونى
وانا قاعد اتفرج ابقى لا مؤاخذة بقى .. ولما الطيران الصهيونى يخترق مجالى الجوى الآف المرات وما اتكلمش ولا حتى بتحذير
يا عم روحوا روحوا ريحوا فى حتة ناشفة ولا العبوا فى الطين ... قال و بتقولوا علينا دول متخلفة
طب مين الى متخلف دلوقتى بقى
أنا : أحنا طبعاً ومش من دلوقتى ده من زمان اوى .. من ايام ما العثمانين قالوا على المطبعة بتاعت نابليون أنها رجس من عمل الشيطان
شافيز : طيب هروح انا أطرد السفير و ارجعلك
انا : آجى معاك اولع فيه
شافيز : لا .. خليه يغور ألهى لا يرجعه
أنا : خلاص .. قشطة يا برنس .. نكمل لما ترجع
شافيز : سلام أيها الرفيق
أنا "كنت باكل" : سلام يا نجم أبقى تعالى عالطووووول
و قولت لنفسى .. هو العار الى لزقته حكامنا لينا هيفضل معانا طول العمر كدة
حتى "شافيو" الى لا هو عربى ولا مسلم شايف اننا مالناش لازمة و طرد السفير الاسرائيلى
أومال ايه .. مهو مافيش حاجة تذله .. لكن عندنا .. مهما خدوا فى دماغهم بالجزمة برده ما بقدروش يقولوا آى ولا حتى يرفعوا عينهم فى عينين ماما امريكا و حفيدتها اسرائيل
NIDAAL
No comments:
Post a Comment