نفسى أشوفها _موزمازيل / tajroba de islaah

يا عينى على المانشيت الى يحسسك اننا بقى بقلنا 27 سنة تقريباً بنصلح فى البلد
تخيل بقى لما واحد دماغه فى الضياع و مش عارف حاجة فى اى حاجة ويقرأ مانشيت زى ده
تجربة الاصلاح بالبلدين .
يقولك بس . دى البلد بتتصلح و العيشة فل اومال الناس الوحشيين دول الى هما احنا
الى بنقول لا للغلط .. بيتكلموا ويهاجموا ... طب ما الحكومة عندها خطة اصلاح اهو
27 سنة أصلاح ومش اصلاح كمان ..لا.. دى لسة تجربة اصلاح هههههههه
حاجة غريبة والله ...
27 سنة اصلاح ولسة فيه ناس مش لاقية تأكل
27 سنة اصلاح ولسة فيه ناس بتتسول
27 سنة اصلاح ولسة موظف الحكومة مش لاقى يأكل أطفاله
27 سنة اصلاح ولسة الشباب مش لاقى شغل .. الى من وظائف الدولة انها توفرله شغل و ان لم يكن
تعطى له اعانة بطالة .. زى فى اى بلد محترمة عارفة وحاسة ان ده من مسؤليتها
27 سنة اصلاح ولسة الشباب مش لاقى يتجوز
27 سنة اصلاح ولسة التعسف هو منهجية الحكومة .. وكل ما يجى حد من امريكا ولا اسرائيل
يروحوا يفرقوا ويفركشوا المظاهرات الحقيقية من قبل ما تبدأ و ينظموا هما مظاهرة صغنونة على قد الحكومة
مظاهرة مؤدبة كدة علشان يقولوا للناس بصوا احنا عندنا ديموقراطية وسايبين الناس تتكلم براحتها و تعبر عن رأيها
27 سنة ولسة بيفكروا يوصلوا المياه و الغاز الى معظم مناطق القاهرة .. ده لو كل يوم بيحطوا مسورة فى الارض كان زمانهم خلصوا .. بس هما خلصوا علينا الاول
........
المفروض كان يتكتب :
تجربة الأعتقالات
تجربة الاشتغالات
27 سنة سرقة ونصب واحتيال .. من وعلى موارد البلد
27 سنة تجربة فشل
27سنة تجربة خراب
27 سنة تجربة هدم
يووووو .. انتوا مش بتفهموا ليه ... انتم حاقدين على البلد وعلى الحكومة ...
انتم عايزينها خرابة.. انتوا الى هتودوا البلد فى داهية ..دى حكومتنا يا الى مش بتفهموا
عايزة تعمل زى اديسون وتحطم الرقم القياسى بتاعه و بما انه نجح بعد التجربة الــ 999
أذاً الحكومة هتكسر الرقم ده و تنجح بعد التجربة الــــ 1999 علشان يبقى فيه فرق سكور
High score

هههههههههههههههه
فهمتوا بقى ولا لسة ؟
وعلشان يبقى الواحد عمل الى عليه ... كلنا عارفين ان فيه يوم 6 ابريل الجاى ده
أضراب عااااااااااام

بمعنى ان ما فى حد هينفع الحكومة بشلن
ما فيش حد يركب مواصلات ما فيش حد يروح الشغل مافيش حد يستخدم اى شىء ممكن يفيد الحكومة
هاا ... ناويين ولا ايه ...
الى شغال يضحى بيوم شغل و يبلغ زملائه باليوم ده ..
كنت بتكلم النهاردة انا وسواق تاكسى راكب معاه وجه فى الكلام حكاية اليوم ده
و طلع انه ما كنش يعرف و انه هيضرب عن العمل فى اليوم ده
وقالى :

اننا لازم نكون ايجابيين و نتكلم ولو لمرة واحدة وبعديها يعتقلونا بقى او يعملوا الى هما عايزيينه
احنا خلاص اتخنقنا على الاخر ..كدة حراااااااااااااااام ..... لغاية أمتى ؟

................................
هتعمل زيه ولا انت فلوسك كتير وراضى عن النظام الحالى ؟