الحرامية و مواجهة أحلام الشباب

ممكن اتكلم فى حال بلدى النهاردة " مصر "
معلش اسمحولى بهذا الاستثناء على صفحات المدونة
و عايز أسألكم سؤال .
هو انتوا كلكم شايفين ان البلد فى منعطف النهاية الكارثية زيى ؟ ولا انا لوحدى الى شايف كدة

هل انتوا حاسيين بالايام الملونة الى احنا داخلين عليها

داخلين ايه .. ده أحنا اولللريدى جواها و عايشينها
أحمد بيه عز غلى الحديد لحد ما وصل دلوقتى لــ 6400 جنيه مصرى
طب قولولى الى عايز يتجوز يلزمه كام علشان يجيب شقة بس
وياريت مش زى كل مرة نجيب العيب على الشباب و انهم مش عايزيين
يشتغلوا ومش عايزيـــــن يركبوا القطر و عايزيين يقعدوا يتفرجوا على التليفزيون وكذا يعنى
لان سقف الشقة بس .. هيحتاج فى المتوسط الى طن و نصف الطن من الحديد
يعنى بتاع تسع تلاف جنيه بالميت حديد بس
غير الرملة غير الزلط غير الاسمنت غير اجر المقاول الى هيصب الخرسانة غير الطوب غير الى هيبنى الطوب
يعنى شغلالالالالانة كبيرة... شوف ده كله هيتكلف كام و المعلم صاحب الليلة دى كلها عايز يطلع بمصلحة
مهى مش هيعملها فرع لجمية الوفاء و الامل ... عايز يكسب طبعاً
أذاً ممكن تحسبوا الحاجات دى كلها هتتكلف كام و مصلحة المعلم كام . ونضيف مصلحة السمسار
ممكن ما فى حدا يقولى على الرقم الى هيطلع ... علشان انا دماغى هتنفجر لوحدها مش ناقصة العملية
:. بما أن الشقة مش هيعرف الشباب يجيبها
نظراً للظروف البنفسجية الى بتمر بيها الدولة العبرية ... أحم.أحم اقصد المصرية
أذاً : من المتوقع ان نرى المزيد من حالات الاغتصاب التى زادت بالفعل فى الاونة الاخيرة

عارفين كام حالة اغتصاب فى سنة 2006 بس 2000 حالة اغتصاب و ننتظر المزيد
نتوقع ان نرى المزيد من جيل نصاب و حرامى
ممكن نضيف مرتشى .. بس اعتقد انها موجودة بالفعل مش لسة هنتوقع
نتوقع ان نرى المزيد و المزيد عن المزيد من حالات الزواج العرفى
و لن يستطيع احد أن يلوم على الشباب ... مع انى طبعاً لا اوافق على اى
موضع من المواضع دى بس فى نفس الوقت مش هقدر الوم الى يعمل اى حاجة من دى
بس ارجع و أقول ان الشعب هو الى عامل فى نفسه كدة
مش بيتكلم ولا بيشكى ولا بتاع
طب هشكى لمين؟؟

الحكومة .. هشكى الحكومة للحكومة طب ازاى ؟
هشكى لمجلس الشعب ... أهو كله ناس مش كويسة و الكويس الى بيفتح موضوع يهم الناس
يطلع فتحى موافقات و يقول .. لقد جائنى طلب مقدم من عشروووميت عضو بغلق باب المناقشة فى هذا الموضوع
من يوافق يتفضل برفع يده .. موافقة !!!!
من غير حتى ما يبص على كام ايد اترفعت .. ولا ساعات ما بيستنى لغاية الناس ما ترفع ايدها
هية موافقة على طوووووول
طب أشكى لمين ؟
احنا بجد داخلين على كارثة يا جماعة
بقينا بنجيب حاجتنا من اسرائيل و حاجات وحشة و مقرفة و نوعيتها و خامتها اخر ز***ة

وده كونتنر يعنى حاوية.. جاية من أسرائيل كان فيها مواد كيماوية

الشركة قارنتها بنظيرتها التركية و الاسبانية

و النتيجة ان الاسرائيلية هى اسوء نوع و اسوء خامة

يبقى ليه اسرائيل ..؟ ليـــــه

وهل احنا فى مصر عندنا نقص فى الايادى العاملة او فى الموارد المادية علشان ما نعرفش نصنع

المواد دى هنا فى مصر و بأسعار أرخص بكتير
و احنا انضف حاجة عندنا بتروح لهم .. و باسعار متهاودة علشان دوول زباين المحل
الغاز بيروح لهم مدعم ... النصف يعنى انا و انت بندفع اغلى من ما اسرائيل بتدفع
هية كارتــــــة ولا أيه يا جماعة ... كارتــة = أتاوة يعنى

كارتة تحرير ارضنا ولا كارتة السلام ولا كارتة على ايه بالظبط
نعمل ايه طيب ؟.. أيه رأيكم نروح كلنا نشتكى اما مجلس الشعب
مش هوة مجلس الشعب و احنا شعب يبقى خلاص
بس كل واحد يودع اهله قبل ما يروح ... دى اعارة يا جدعان أعارة شاقة

nidaal