ياما في الميكروباصات حواديت

النهاردة يوم مش بطال بس اليومين الوحيدين الى بحس فيهم بالكسل و الملل الجمعة و السبت بما انهم أجازة ودي بتبقى فرصة أن الناس تشتغل بعض شاءت الظروف أني أركب العربية السوزوكي الصغيرة دي الى نازلة جديد وعاملة زي الميكروباص بس علي شكل علبة تونة ركبت جنب السواق علشان لو قعدت ورا يبقى كل شوية هنزل واطلع علشان الناس الى بتركب و الى بتنزل ومش كدة وبس .. شوفتوا افلام الكارتون لما بيروح طااااالع فوق خالص ويلزق في السقف وينزل تاني اهو كان ده الى بيحصل فى الناس الى قاعدين ورا قولت أفتح مع السواق ( شاب) حوار أو أى بتنجان يمكن يقول كلمة حلوة فقولت ادخل له من مدخله .. العربيات وقد كان وسألته علي سعر علبة التونة الى احنا راكبنها قولتله أصلي بفكر أشتري واحدة وأخلي اى حد يشتغل عليها قالي دى عامللها60 ألف جنيه .. بصيت له وقولتله نعــــم رد وقال ايوة بس هي ممكن تكون نزلت لـ40 ألف بس قولتله يا عم دى ملاكي أساساً مش أجرة وانت الى مشغلها ع الخط سكت وما اتكلمش وانا ما كملتش لأني ماكنش عندي أستعداد أن حد يشتغلني اليوم ده فقولت في دماغي ( أشتغلني يوم آخر ) علي رأي عمنا بوند

واحد تاني بقي في عربية ميني باااااظ شغالة علي احد الخطوط برده ركبت وقعدت وأترستقت وكله تمام .. و المعلم عمال بيشحن في العربية تقولش مثلاً أنها آخر مرة هيحمل زبائن في العمر المهم .. طلع ( طلعت روحه) وشغل الأم بي ثري الى موصله علي العربية والصوت كان عالي فعلاً .. وانا قاعد في المقصورة الى ورا و السماعات فوق ودني والناس وانا عمالين نادي على التباع و نقوله خليه يوطي التسجيل شوية يقولنا ده آآآآخر حاجة يا أبني يهديك يرضيك .. مافيش وقال ايه ... إلي مش عاجبه ينزل !!!!
أنسحبت من لساني في نفس ذات اللحظة قولتله لأ .. أنا مش عاجبني ومش هنزل بس بص .. أجرتك في أيدي أهي ومش هديلك أجرة غير لما البتاع يوطي مش عايز أجرة خليها عالي زي ما هو ... طبعاً هو افتكرني بتكلم كدة فى الهوا وخلاص وخلي الصوت عالي زي ما هو وانا بالفعل ماتدلوش أجرة وانا نازل قولتله بص أديك انت خليت التسجيل عالى وانا ما أديتكش أجرة بص وما أتكلمش

أما بقى المعلم رامي بوؤو ده سواق تويوتا بقى المرة دي أصلي بحب التنوع في الميكروباصات .. علشان الواحد ما يحرمش نفسه من حاجة المهم أنا راكب فى الكرسي الى جنبه واحنا ماشيين فشاف كام نفر كدة من القسم موقفين ميكروباص و بينزلوا الناس الى فيها علشان يركبوا هما ويلفوا بيه ( لدواعي إرساء الأمن فى المنطئة) راح قايل : ولاد الــ*** دول مش هيسيبونا نشوف أكل عيشنا بقى كل ساعة و التانية ياخدولهم عربية يلفوا بيها .. هما فقرا ما يجيبوا عربيات للقسم فأنا قولتله طب وانت بتعمل أيه لما بيجوا ياخدوك بالعربية علشان تلف معاهم قالي ولا حاجة ... بروح معاهم فأنا بصيت له عايز أقوله يعني انت عمال تتكلم وتشتم وبتروح معاهم برده بس هو عاجلني بسرعة وقال لي ضاحكاً مهو علشان كدة سمونى بوؤوو ... علشان زيي زي الشعب المصري كله بيتكلم كتير ومش بيعمل حتي القليل
ههههههههههههههههههههههههههههه

فضحكت وقولتله : طب وانت ليه ماتقولوش لأ .. دي عربية اكل عيش وانا مش هقدر أطلع معاكوا قالي : أصل الخط ده مش تبع السيرفيس يعني مش قانوني و العربية ذات نفسها مش قانونية لأنها رحلات مش أجرة وحتي لو أنا سليم و كل حاجة سليمة فدول أساساً بلطجية وممكن يلبسوني قضية ولا حاجة فأنا أروح معاهم ساعة ولا أتبهدل بالأسابيع في الأقسام وادفع غرامات أد كدة

!!!!!!!!!!!!!!!!!!!!!!!!!!

الخط الى مش قانوني الى الحاج بوؤوو بيتكلم عنه هو الخط الوحيد بمنطقة ذات كثافة سكانية عالية جداً ( عين شمس - دائري) فإزاى خط زي ده مش معمول له سيرفيس لحد دلوقتي .. بالرغم من .. أن الحكومة أكيد أكيد عارفة كويس أن فيه خط ميكروباصات الموت في الحتة دي وبالرغم من أنه بيعدي من أمام مبني حي المرج وبالرغم من أنه بيعدي علي مقر الحزب الوطني بالرغم من أنه بيعدي من أمام مركز الشباب إلا ان الظاهر هما شايفين أنه كدة أحسن ما يبقى قانوني لأسباب سرية تقتصر معرفتها علي الخبراء الى كلنا ثقة فيهم وفي إدارتهم للأزمات زي ما فيه فى نفس الشارع ماسورة مياه أنفجرت من كذا حتة .. محولة الطريق من عين شمس للدائري لبرك مياه منفصلة و المشكلة انها مية حلوة ولا الترعة الى بيقولوا انهم هيردموها ( بمنطقة عزبة النخل ) من عشر سنين ولسة لحد دلوقتي موجودة بل وأن المياه الى فيها ساعات بتطلع علي البيوت القريبة ...... من داخل علبة التونة مراسلكم في البحار / نضـــــال