المتروباص .. عبارة عن باسكت للفرفزة

حوارات ومواقف المتروباص

الناس المصريين دى عليها أفتكاسات غريبة أوي
وناس تانية خنيقة وباردة فى نفس الوقت
امبارح وأنا فى المترو .. واحد خنيق جداً وبارد راح مشغل الحتة الصينى بتاعته
الى كل الى فيها صووت ولا كأنه فرحان بيها .. ومشغل اغنية شعبى

ووسع للدي جــي الى أشتغل يا ريس

ففى راجل كبير قاله احنا مصدعين .. وطى البتاع ده الواد عمل انه بيوطيه راح طفاه

واحد طلع بقى
تقولشى بروفيسور بيتكلم وقال .. " الصين أساساً عاملة العدد دى علشان تبوظ شبابنا "

راح ملاحقه فى الكلام واحد تانى كبير برده زيه وقاله
" وهو أحنا شبابنا مستنى الصين .. مهو بايظ لوحده .. ده يروح يديهم كورسات "

هههههههههههههههههههههههههههههههههههههههههههه

وبعد ما الناس اتكلمت ووابل الانتقادات الغير مباشرة راح الانسان البارد ده مشغله تانى طبعاً الكلام كله صح .. وأشك فى حتة الصين دى بس الواد بقى من الاول ليه ما يحترمش نفسه .. ويبقى محترم كدة علشان مايبقاش اراجوز المترو ..
فى نفس المترو برده

واحد ومراته وأطفالهم الاتنين قاعدين فى الكنبة .. أزاي بقــــي
أبنه جنبه وبعدين مراته وبعدين أبنهم التانى !!!!!!!!!!!!!!!!!!!!!!
يعنى يخرب بيت البروووود و الناس الى معندهاش دم

مع ان فيه رجالة سنهم كبير واقفين المهم ان لما جت واحدة وقفت راحت مقومة أبنها وقالتلها أقعدى
ليـه العنصرية دى طيب

وبعدين الى قعدت دى بعد كام محطة جت نازلة .. معنى كدة ان فيه مكان فضي
راحت تأرجحت شوية فى الوسع وراحت مقعدة ابنها تانى مكانه

والى انا أستنتجته ان البيه بيخاف عليها من التحرش
فعلشان كدة موصيها انها ترزع الواد جنبها كمنصة لصواريخ الدفاع الجوي
مع ان المفروض أنه هو قاعد فى اخر الكنبة .. فيبدل معاها وتيجى
هى فى اخر الكنبة علشان تبقى مافيش حد جنبها ألا جوزها ويقعد هو الناحية التانية .
علشان الى عايز يقعد يقعد بقى .. راجل ولا ست

ويحسسوك انه حق مكتسب ولو راجل ... اتكلم بقى
بس الغلط مش عليهم الغلط على الدغوفاااات الى واقفييين ومخروسين وماحدش فتح بوؤؤؤه
....
برده أمبارح بعد مانزلت من المترو

الناس بتعدي من على القضيب علشان مكسلة تطلع السلم
وشايفين ان المترو الى الناحية التانية بيقفل أبوابه وهيمشى مش يستنوا بقى لأ
كله بيجري علشان يلحق يعدى ومايستناش المترو لما يعدي.. وتخيلوا
والله كان المترو خلاص ماشى وبرده واحد بيعدى وهو بيجري من قدام المترو وهو ماشى وطبعاً السواق راح مدى سرينة قوية وطويلة اوي لفتت نظر كل الى على المحطة كأنه داس واحد مثلاً

وأضحكوا بقى جااااااااااااااااامد اوي
أمين شرطة واقف على اول المحطة .. شاف المنظر وسمع السرينة
راح متفرفز فرفزة جامدة جداً.. وقال انا لازم اعمل حاجة راح مزعق للشخص الى كان بيجري قدام المترو وقاله

أنت حماااار .... أنت مش شايف المترو طالع
وبس كدة ... شوفتوا البااااشا بيقضى واجبه أزاى
علشان المغرضين والقلل المندسة ما يتكلموش كتير على رجالة الحكومة
باااااااشا وربنا يا جدعااان .... باااااااشا

يخرب بيت العتهه .. والبرووود
التناحة والرزالة والجمود

يارب افتح فى الارض أخدود
يبلع الى وارثين انعدام الدم من الجدود