مهــــــيــس _ تخاريف ما بعد الافطار

كنت قاعد مع نفسى كدة فى البلكونة ساعة الفجر فمش عارف ليه فكرت مصر بعد 200 سنة هتكون أزاى هل هتكون زى ما هية مافيش حاجة هتتغير ألا مجرد شوية مناصب و كراسى جديدة بتتلمع وهل وانا قاعد كدة بعد 200 سنة على الانترنت من خلال الديال - آب "خط التليفون " و برده عمال بشتم فيه علشان بطىء جداً و كل شوية يفصل وساعات باخده على قد عقله و أسايسه وبعدين أدخل على الفيس بوك مافيش رسائل جديدة مهمة أخرج وادخل على الايميل بتاع الياهو وبرده مالقيش الا رسالة واحدة مهمة أدخل على البلوجر ملاقيش فيه كومنتات جديدة و اكون برده لسة بعمل أيميلات على الهوتميل و انساهم كلهم ولسة برده مخنوق لان معظم الاماكن الى بروح أشتغل فيها سياستها بتتعارض مع مبادئى سواء فى الصحافة او الاعمال الى أشتغلتها قبل ما ادخل الصحافة بجد , فهل هيفضل الحال كما هو عليه .. مش عارف بس بعد 200 سنة ممكن نشوف

هيقى فيه حاجة كدة زى توارد للخواطر بينا وبين الاجهزة فكل جهاز لن نضطر لتشغيله من خلال الكهرباء و الضغط على زر ما ولكن بمجرد تفكيرك فى تشغيله هيشتغل لوحده و بيشحن نفسه من خلال الطاقة الشمسية و مش بيشتغل و بس ..لا.. ده بيقوم بمهمته كمان من غير تدخل منك زى المكنسة و المكواة و الكمبيوتر الى هيوفر عليك تكتب العنوان الالكترونى وهيقرأ افكارك و يفتح الموقع الى فى دماغك و من غير أسلاك متوصلة بعقلك ولا حاجة

أيه التخلف ده ... انت لسة عايش فى زمن السلك و الفيشة ..أصحى يا عمنا و فوق أحنا فى زمن " الواير-لس " و البتاعة الى انت بتقول عليها الى اسمها الاسلاك دى انقرضت من زمان زى ما قريت فى كتاب للتاريخ انها كانت موجودة من قبل الحرب العالمية و لغاية ما بعد عهد رئيس كدة كان مستبد شوية -تين - تتات كان حكم مصر فترة وكانت من اوحش الفترات على الشعب المصرى سواء غنى ولا فقير ماحدش سلم منه و الشعب كان نايم وكله خايف وبيتكلم فى سره بس احنا دلوقتى بقى مافيش عندنا الحكاية دى و مبرمجين الرئيس بتاعنا بلغة السى ++ .. و الفيجوال بيسك على العدل و الحرية و برمجناه كمان على انه مايتقبلش ظغوط من اى حد و تخيل انه مش بياخد مرتب ده حتى بيشحن نفسه مش من الطاقة الشمسية بقى ..لا .. احنا الجداد يلالاه .. ده هو مكتبه فى ميدان عام كل ما حد يكون ماشى يروح ضاربه على قفاه يقوم يشحن عالطووووول وينوررر .. ده احنا حتى عاملين اعلان فى التليفزيون بيقول " كل ما تضرب أكتر فرصة رئيسك فى الشحن تكتر "و الناس عارفة انها لازم تعمل كدة علشان ده واجب وطنى مش زى عندكم قعدوا تشتموا فيه و تعارضوه و فضل برده قاعد على قلبكم أكثر من 28 سنة .. مع انى كنت بسمع عن بنت أسمها خيخة بتنظم حملات كتير للتبرع بالدم زى ما قال المؤرخ فى كتابه الى مافيش منه فى السوق دلوقتى .. بقولك ايه يا عم فكك منى و من السياسة اه ..ما توديناش فى داهية .. داهية ايه "نوض" ..!!! نوض مين ياه ؟ انت .. انت نوض مش اسمك نضال يبقى دلعك نوض .. ولاه انت شكلك من أقارب سوووز .. يااااض .. الولد المدون الى كان ايام زمان ده وكان عامل نفسه عجوز وبيقولك قال أيه .. انا عجوز وعندى 30 سنة وهو أساساً شكله ما يتعداش العشرين سنة .. وبيجرى وبيتنطط كمان المهم أسيبك انا بقى علشان يادوب ألحق اخر مترو .. طب سلام ..سلام

تزلت المحطة وأول ما فكرت اقطع تذكرة لقيت ماكينة جنبى بتقول " أتفضل " وراحت مطلعالى تذكرة طبعاً انا فرحت لانى مادفعتش فلوس و قولت أهو من الضرايب الى دفعناها زمان وروحت أركب المترو وياريتنى ما ركبت لاقيت نفسى محاصر من جرس أنذار وعساكر آليين قولت الله هو فيه ايه ولا تكونش عربية السيدات وانا مش واخد بالى المهم جرجرونى على الارض على طريقة " مادونا" فى اغنية

" die another day "

و أتعملى محضر كل الى خدوه فيه العنوان و الاسم ولا طلبوا غرامة ولا بتاع و سألتهم هو انتوا بتعملوا محضر ليه أساساً .. أتفاجئت انى علشان ركبت من باب النزول مش من باب الصعود و انا أقول الناس عمالة بتبصلى بصة مش مظبوطة .. فركبت المترو تانى بس من ابواب الصعود بقى شوفت الموظفين عمالين بيعملوا بأيديهم حركة زى كانك بتقلب فى الجورنال بالظبط بس مافيش حاجة فى أيديهم فقولت اقرب يمكن أعرف فأكتشفت انها الجريدة العادية خالص عبارة عن شاشة شفافة جداً و رفيعة جداً جداً امامهم و بيتعرض فيها اخر الاخبار على هيئة صفحات جريدة و بعد ما يخلصوا يروحوا مطبقين الشاشة دى الى هية الجريدة يعنى و يروحوا نازلين وحظى كان كويس جداً لدرجة انى لقيت كرسى فاضى و فيه شوية شباب واقفين ماقعدوش فقولت اقعد انا فلما جيت أنزل لاقيت واحد فيهم بيقولى محتاج أى مساعدة .. انت ايه الى بتشتكى منه رجلك فيها حاجة ولا ايه !!! انت بتفووول عليا ليه يا عم انا سليم وعشرة على عشرة قالى انت مش كنت قاعد على الكرسى ده فقولتله ايوة قالى طب مهو ده بتاع الحالات الخاصة بس و الناس العجوزة قولت فى نفسى كدة ... أااه شكل الصفارة بتاعت الانذار هتضرب تااانى ولسة ما كملتش الكلمة لاقيت الصفارة ضربت و المترو وقف وفتح الابواب بعد ماكان دخل المحطة طبعاً فجريت وجريت وجريت لاقيت نفسى فى سوق الجمعة و البياعين بينادوا ويقولوا " قرب و أشترى قبل البورصة ما تفترى " فقولت فى نفسى حتى البورصة البياعين دخلوها فى كلامهم .. هو التخلف هيفضل ورانا ورانا . وواحد تانى بيقولك

" ايوةة .. ايوةة .. قشطة يا مان ربنا يعمر بيت البورصة"

و لكن فى نفس الوقت بياع جنبه بيقول

" ابوووس أيدك أرفعى السعر ده انا لسة بستفتح .. الله يخرب بيت البورصة "

و بصيت على الفاكهة عاملة كام فوجدت ان لوحات الاسعار مش زى ما انا عارفها ورقية ..لالا .. دى الكترونية و بتتغير كل 8 دقايق لانها متصلة بالبورصة عن طريق القمر الصناعى ولما حاجة سعرها بيزيد بتزيد معاه وهكذا .. وأكتشفت ان انا الى متخلف ومتأخر عن البياعين دول لما شوفت البياع الى بيقول

" يا ناس يا لوكال يا شعبيين سيبكم من الخضرية

التانين " و

come baby come ..come baby come .

كما قال " هيثم دبوووور" الحائز على جائزة أفضل ممثل فى المئوية الالكترونية

ولما روحت البيت لاقيت فاتورة ماعرفتش أجيب أخرها و بعد ما كنت فرحان اوى انى مادفعتش الغرامة فى المترو و انى ما دفعتش حق التذكرة لقيت فاتورة جاية بكل ده مع صورة المحضر و صورتى وانا بقطع التذكرة ... يلا أدينا أخيراً وصلنا للفيزا حلم العمر .. بس انا نفسى فى موتوسيكل ريــس بقى .. ده يجى على الفيزا برده يا باشا ؟

NIDAAL