نضال المتوج .. هاا

البوست عبارة عن 3 تاجات بس فى السريع على غير العادة البوست ده طويل نسبياً
تاج الاحلام مرر من خلال هيثم الدهشان صاحب مدونة همسات العشق
وتاج الواجب الى انا مش فاهمه وتاج الشباب من عاشقة الفردوس
توكلنا على الله :
...........................
تاج الاحلام




أذكر أحلاما تخص ماضيك كنت هتتخلى عن إيه فيها و هتتمسك بإيه لحد دلوقتى
كنت بحلم واتمنى انى ابقى كبير . دى مش الاغنية .
كنت بحلم انى أركب الطائرة او السفينة
حلمت انى أبقى ملتزم التزام كامل
فى نفس الوقت حلمت بأنى أغنى
حلمت بانى اكون صحفى غير عادى
فيه احلام كتير اوى يا جدعان / ت
ايه الى كنت اكيد هستغنى عنه
أستغنى عن انى ابقى كبير و أفضل صغير
واكثر ما هتمسك بيه
هو الالتزام و الصحافة و الطائرة و السفينة

أذكر احلاما تخص مستقبلك وما تتمناه منه
بحاول قدر الامكان تجنب المستقبل ولكن لا محالة فانه قادم قادم
والحلم هو انى اكون صحفى مش كبير ولكن يميزنى شىء فى عملى
مش بحب اكون عادى طبيعتى كدة
وبحلم بانى استطيع فى يوم من الايام ان أحجج والديا ( أمى و ابى) وأحج بعدهم

أذكر شخصين على الأقل متواجدين فى حياتك كنت تتمنى وجودهم من قبلهم

يخرب بيت الزهايمر هههههههههههه
مش رد موقف ولكنه الحقيقة بجد هيثم الدهشان شخصية جميلة اوى واصيلة جداً
زى الصباغ برغم اختلافنا بعض الاحيان القليلة فى بعض النقاط وده طبيعى جداً
نيجى لسوووووز حبيبى الى علمنى وبدون ما يقصد اشوف الفيلم ازاى واستمتع بيه
الفاتحين الجعفرى و اليعقوبى الى اكثر ما اعجبنى فيهم أخلاقهم الرفيعة جداً جداً وفكرهم العالى
جولدا الى بنحب بعض اوى برغم انه قرب على الصهيونية ههههههههههههه
........
عاشقة الفردوس الى بتأثر فيا اوى بكلامها ربنا يخليهالنا يارب وما يحرمنا منها
آآآآبى الاخت الى انا شايف انها اخت صغيرة برغم انها اكبر سناً
ياسمين ( ارض الاحزان ) الى لما بكون عايز اعمل دماغ حزن بدخل عندها بس حزن على خفيف كدة
ميرا الى بيبقى نفسى اقولها انتى عارفة انا بفكر فى ايه يا بتاعت عقل الرجل انتى هههه
وكل الناس الى بقعد معاهم وأعرفهم وده مش ترتيب اولويات ولا بتاع .
كلوا زى بعضه وكل واحد ياخد زى أخوه
أعتقد انه كفاية كدة .. ولا أكمل >>

أذكر شخصين على الأقل غير متواجدين فى حياتك و تتمنى وجودهم مستقبلا فى حياتك وحياة اولادك

اهااا .... بص بقى فكرة الارتباط و الجواز و شريك العمر و الحاجات دى انا مش بفكر فيهم نهائى حالياً
ولا اعتقد انى هفكر فيهم من الاساس .. مش فقد امل ولكن الحرية افضل يا عم ههههههههه
نتكلم جد : أتمنى أن أعود أنا بتاع زمان . لان انا مش متواجد فى حياتى حالياً . يعنى اتمنى انى ارجع نضال او محمد بتاع زمان
( فى المستقبل ) مش بتاع دلوقتى
لان تقييمى لنفسى انى زمان كنت افضل بكثير . وبحاول اتحسن فى كل حاجة
.................................................
نيجى لتاج الواجب الى مش فاهمه عن جد

أذكر اسم من طلب منك حل هذا الواجب

عاشقة الفردوس

أذكر القوانين المتعلقة بهذا الواجب

مش لما اعرف الواجب ابقى اعرف قوانينه
ههههههههه

تحدث عن ستة أسرار قد لا يكتشفها من يقابلك للمرة الأولى.
والله بما ان مافيش اسرار فى حياتى فيبقى هخليها ست اشياء

1_ عصبى جداً برغم انى فى نفس الوقت هادى اوى

2_ هغشها من عاشقة الفردوس :
عندى 3 اخوات بنات وانا ولد وحيد وواحدة فيهم اكبر منى
حاصلة على بكالوريوس تربية - وواحدة أصغر منى بسنة الا 16 يوم بكالوريوس دراسات تعاونية ( تجارة)
والصغنتوتة خالص سنة اولى كلية أثار جامعة القاهرة
3_ بسمع اكثر من ما بتكلم
4_ مش بعرف أكره حد ولو حتى كنا متخانقين
5_ بعشق فيلم الكارتون ( lion king)
6_نفسى ابقى صحفى مختلف او مميز بشىء معين وبصراحة عايز منكم انكم تدعولى اوى اوى

حول هذا الواجب إلى ستة مدونين، وأذكر أسماءهم مع روابط مدوناتهم في موضوعك.
بصراحة انا عندى زهايمر جاااامد اوى فعلشان ماانساش حد
التاج ده لكل الى هيعلق .. وما بعتقد انهم هيجيبوا ستة يعنى
ههههههههههههههههه
......................................
تاج الشباب ... مانظرتك للبنات ذات الملابس المخالفة للإسلام؟

بدعيلهم ولنفسى من قبلهم بالهداية ومش بالضرورة تكون البنت الى لابسة قصير مثلاً وحشة او ما شابه
بالعكس انت لو دورت هتلاقيها انها تملك قلب طاهر بس ما كانتش عارفة الطريق الصحيح

هل تحكم على اي بنت بمجرد النظر الي لبسها ؟ وماهو معنى الاحتشام عندك ؟
لا طبعاً ما بخدش النظر كحكم لان فيه الى اتربوا على كدة فمش بيحسوا انهم بيعملوا حاجة غلط
وفى رأيى ان البنات دى مظلومة و محتاجة لتوعية صحيحة . صحيحة . صحيحة .
معنى الاحتشام : انها تكون ذات اخلاق حميدة قبل ان ترتدى ملابس محترمة
بمعنى انى مش محتاج لمزيد ممن يشوهون صورة الاسلام تحت اى ستار كان (الحجاب)
بسبب ضياع اخلاقهم
اتمنى انها تكون واصلة .

هل لحشمة الملابس دور في احترام الفتاة ام انها قناع زائف لدى بعض البنات؟

قناع زائف ما نقدرش ننكر لكتيييييير من الفتيات الى اتصادف وقابلت بعض منهم كتييييير
ولكن برده فيه كتير من خيرة البنات الى محتشمين بملابسهم... وباخلاقهم و تصرفاتهم قبل ملابسهم

مامدى تاثير اصدقائك على طباعك وشخصيتك؟

مش كبير او منعدم

أترى ان الغزو الفكرى أحد الاسباب التى ادت الى هذا الوضع؟
هو عامل من عوامل كتير بس فى رأى الشخصى ان كل واحد فيه عقل يقدر يحكم على الحاجة هل هى مفيدة ولا ضارة هتناسبنى ولا لا
لكن الى ملاحظه دلوقتى اننا بناخد اى حاجة فى اى حاجة بناطيل مقطعة على هاف باديهات واعتقد انها حتى مش هاف كمان
ده حتى البنطلون الساقط الى طلع فى الغرب للشواذ علشان يعلموا نفسيهم بيه ويعرفوا بعضهم .. بعض الشباب المصرين فرحانيين اوى بيه ومش عايز اكمل ...

هل تدخل اسرتك في انتقاء ملابسك يضايقك ويقلل من شأنك ويسلبك حريتك الشخصية؟
بالعكس انا مش بحب الراى الفردى, بحب المشاركة ولو انى فى احيان كتيرة فى الاخر بجيب الى انا عايزه برده هههههههههههههه
حتى لو قالولى عليه وحش , وبحب جداً أنزل اشترى مع والدتى وبصراحة مش بحب انى انزل مع والدى نهائى
وساعات بنزل لوحدى .!

وفى النهاية أعزائى القارئين أشكركم بالنيابة عن فريق عمل البرنامج و اتمنى ان تكون التاجات قد ساهمت فى تحديد بعض من السمات الشخصية للكاتب
و التاجات تمرر لكل من يعلق .. شكراً
والصورة دى هدية منى ليكم لاقيتها على الانترنت وعجبتنى

NIDAAL